ديوان الشاعر / ناصر بن عبود

السلام عليكم ورحمة الله وبركاته

هذي قصيدة قلتها في حفل زواج الأخ / ماجد بن سعود بن شايع المحلفي السهلي




[poem=font="simplified arabic,6,black,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black""]
مبتداي بذكر عالم كل غيب=كوّن الكون وخلقنا من تراب
الاله اللي على خلقه رقيب=أرتجي ستره وعفوه فالحساب

لادعونا أهل المكارم نستجيب=ونتشرّف ونتقدّم بالجواب
ولاغرابه من مدلهة الغريب=فالكرم والطيب وبحسن الجناب
والردي نظرب على اسمه بالصليب=ولاعلينا منه جعله للذهاب
خابرينه فالولايم مايغيب=والملمّه لادعى داعيه غاب
أشهد ان المرجله حظ ونصيب=ولالها ألاّ اللي يذلّون الصعاب
مثلكم ياربعنا سقم الحريب=ياهل الطولات حامين العقاب
ياقلم سجّل وقافك مايشيب=وأطرق من الشعر بالأمداح باب
للنشامى عندنا حق مصيب=لو بشي ٍ هيّن ٍ وسط الكتاب
سيرة ٍ تمدح على فال ٍ يطيب=وأتأخيّر بين مالذ ّ وطاب
من كتاب المجد فالوقت العصيب=اعتلوا من طيبهم روس الهضاب
ربعنا اللي لاعوى ذيب ٍ لذيب=إتباشر بالعشى سحم الذياب
كم عقيد ٍ صاطي وراسه صعيب=ظن فيهم ظن مير الظن خاب
يوم في الصمان شباب وشبيب=جاهزين للحرايب بالحراب
وجاء طلبهم كنه السيل الجذيب=ومن جرد سيفه حذف عنه الجراب
مانشاورهم ولانرسل نديب=ولانتوب وخصمنا مايستتاب
وداهم السرهيد له قاف عجيب=يثبت اللي وش بأقوله فالخطاب
قال لاضلع طويل ولاصحيب=كود حد السيف مصقول النصاب
والتخلّي عن هل الطولات عيب=ولاحياه ولاطراه لمن يهاب
وزعزع أبناء سهل بالجد العريب=ياحمول الخيل وحماة الركاب
وبعد ماوصل البعيد امن القريب=اجعلوهم بين ظرس وبين ناب
واثبتوا بالعزم والرأي الصليب=وبالسيوف اللي يقصن الرقاب
كل فارس لاظرب ظربه عطيب=لمع سيفه لاهوى مثل الشهاب
ترفع الرايات واشرب ياشريب=والمعاند بيننا عند الشراب
وشمسهم قامت تدانا للمغيب=ونجمنا شرّف ونجم الظد غاب
جمعنا يفرق حبيب عن حبيب=والخطأ نعمي عيونه بالصواب
وكم ثنينا دون زاهية الخبيب=بالسيوف المرهفه وأم الخشاب
وموسى بن كاشف معه علم غريب=جاك يزمي مثل مايزمي السراب
والنذير اليا أنذره ماله مجيب=ولايشوف لمنذره فضل وثواب
غرّه جموعه وسبره والرقيب=ولاحسب في مجزّل لموته حساب
مادرى أنا رمينا دايم يصيب=في نهار ٍ عج خيله كالضباب
ومادرى أنّا نودع العيّال أديب=وعن حمانا مانعين الإقتراب
وأوّل الصيدات عبّاد الصليب=قام ينقر عينه الصفراء الغراب
والدليل اللي معه يبغى الهريب=مير سور المجمعه بعد السحاب
وأندمر جيشه على الروض العشيب=بعد ماصطناهم بصوط العذاب
ذا قتيل وذا طريح وذا صويب=وذا جزاهم يوم درج الملح ذاب
ومن دماهم خطر ٍ يسيل الشعيب=كل مانسهجهم يزيد النصاب
أربع إمية تركي ٍ ماله طبيب=علّته رمح ٍ قصير بسم داب
وفالختام أقول ياسقم الحريب=ياهل الطولات حامين العقاب
مدحكم بالطيب مالي فيه طيب=وأنتم أهل الطيب شيبان وشباب
[/poem]

السلام عليكم ورحمة الله وبركاته

هذي قصيده عن الأوضاع السياسيه الحاصله في بعض الدول العربيه



أنا البارحه مشغول من كثرة التفكير
ولايشغل الواحد سوى كثرة أفكاره

وترى مايعومس خاطري غير شي ٍ غير
يخلّيني آسف له والأعصاب منهاره

وبعض المواقف دونها يقصر التعبير
ومن يعتبر يدري ان الأيام دوّاره

أحسب العرب في خير لكن وين الخير
مادام ان بعض شعوب الأوطان ثوّاره

وكل ٍ يبي اسقاط النظام ويبي التحرير
ومن اللي حصل كل ٍ يبي ياخذ بثاره

هذا حاكم ٍ فاسق هذا حاكم ٍ شرّير
وهذا حاكم ماجت ملايينه تجاره

وفلسطين خلّوها لأوباما وأخوه بلير
وجيش اليهود يلحّق الغاره الغاره

وصدّام ضحّوابه ضحى العيد لاتأخير
بدون احترام لدين الإسلام وإشعاره

بعد جاك زين العابدين بعماه مغير
وعلى شعب تونس شدّد الخاين حصاره

وثاروا عليه الشعب عود ومره واصغير
ومن خان خانه جيشه وباقي أنصاره

وحاول بدهن السير لكن عيّا السير
وأراد الله إنّه ينحشر في عقر داره

وبعد شاف شعبه يرفع الصوت بالتكبير
مافكّر يهج ألاّ على متن طيّاره

وحسني مبارك وسط سجنه تقول بعير
بعد مااطرحوه القوم لفّوه بهجاره

وخلّوه يبصم بالأصابع على التقرير
على مافعل فأرض الكنانه كما الفاره

ولاهمّهم وضعه لو إنه على السرير
ولو تظهر صورّه ولو تنشر أخباره

ومعمّر يحسب انه مع الوقت مثل الزير
ويحسب ان مايبغى يجي رهن الإشاره

وتواجه مع الثوّار بالقصف والتدمير
وبعد فوق ست أشهر معمّر طفت ناره

وفي سرت وقّف وانتهى معه خط السير
ولاأحدن هقى ان نهايته وسط عبّاره

وجيش التحالف ينشر الكفر والتنصير
ومعروف ميراده ومعروف مصداره

يبي ينهب الخيرات من ليبيا وينير
ويبي الغاز والفولاذ والنفط وآباره

وعلي صالح الله يصلحه ناشه التفجير
ولو طاع ماحطوه ربعه كما الشاره

ومع انه تشلوط بالقذيفه تقول طوير
على العرش متمسك بيمناه ويساره

وذا جاد ظني جاك الى المملكه تصدير
ولافيه غير التونسي ساكنن جاره

وبشار شعبه بالمطالب يبي التطوير
ومن كان شرّه سيل خيره بقطّاره

وعلى الشعب الأعزل قام جيشه يدق الزير
ومن كثر قتلاهم مالـ ِ الناس قبّاره

وبعد بلغوه الربع بالوضع من تحذير
عميل الإيراني رز عنقه ومنقاره

يحسب ان نجاد الرافضي عنده التدبير
وهو تالي الأيام لإيران معباره

ومن كان مثله ودّك يحاكم بتعزير
على شان يلقى ماتقدّم من أشراره

ولو كل طاغي يسقط يحط له تشهير
لقيت العرب كل ٍ يحافظ على أسراره

السلام عليكم ورحمة الله وبركاته

هذي قصيده ترحيبيه في حفل زواج المهندس / مخلد بن سلمان بن نمشان الظهيري السهلي


[poem=font="simplified arabic,5,black,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black""]
باسم أبو مخلد هلا مرحبا بالحاضرين=وأتقدم عنه وأقولها وكلّي فخر
مرحبا ترحيبة ريح مسك وياسمين=عد مالبّى الملبين واعداد المطر
مرحبا وأهلا وسهلا على سمن وسمين=كل واحد له تحيّه وتقدير وقدر
شوفة أهل الخير في خير تفرح كل عين=غير عين الحاسد وراعي الوجه الغبر
جمعنا الليله على رفعه وتقوى ودين=وأشهد ان جمعا النشامى تطوّل فالعمر
جيت أبا أبارك وأشارك مع طوال اليمين=كانها بالجهد والمال وألاّ بالشعر
ودعوتك ياخوي سلمان مبلغها ثمين=والعذر والله ماأقدم لدعوتك العذر
بيني وبينك عهد والوفى بالعهد دين=الوفى بالعهد منّي ومنك أنت الصبر
بعد ذا ياهاجس الشعر حنا جاهزين=ان غرفنا من بحر وان نحتنا في صخر
انتقدم وانتوكل على الله المعين=وان توكلنا على الله كفانا كل شر
نعتلي روس الشواهيق والقاسي يلين=بالهدو يوم الهدو وبالقشر يوم القشر
وفالمداحم نقدر نداحم بجنب متين=ومن نجي له درع وحزام يبشر بالنصر
ونحمد الله يوم حنا بأمانه وامنين=والفضل والشكر له ثم لولاة الأمر
دولة الاسلام عند الرجال المخلصين=تحت حكم ملوكنا أهل السياسه والفكر
محتمين الحد رغم أنف كل الحاقدين=ولاحد ٍ يقدر على حدّنا لو هو شبر
كلنا شعب وحكومه ترى متكاتفين=وأنا ربعي كلبوهم ماهم بأهل الغدر
السهول الأنجبين الكرام الأمجدين=مالكين المكرمات وهل المجد الأغر
وبعد ذا شمّر عواني وشمّر طيبين=شمّر أهل الطيب وأهل الكرم وأهل الظفر
الطنايا أهل المواجيب من ماضي السنين=مجدهم معهم وسام ٍ يعلّق فالصدر
وفالمطاحن كل حب ٍ يبي يرجع طحين=يطحنونه طحن لو كان حب ٍ من حجر
يملكون الخيل والبل مع السيف السنين=ويعتلون الخيل من دون حسكات الوبر
كم ثنوا فالحرب من دون جرعات الحنين=دربهم مع دربها سلم وألاّ في خطر
والبل والبل ماتجي غير بإحدى الحمرين=ياأمّا بالمال الحمر وألاّ بالدم الحمر
ذا وصلّى الله على أحمد ختام المرسلين=اصطفاه الله مبشّر ومنذر للبشر
[/poem]

السلام عليكم ورحمة الله وبركاته

هذي قصيدة أرسلتها للشاعر / سعد بن حسين الحبابي القحطاني

وأبو حسين شاعر جزل وصديق وأخ


أقول في القصيده

[poem=font="simplified arabic,5,darkblue,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black""]
أنا البارحه ماطبّق الجفن فوق العين=هواجيسٍ تروح وهواجيسٍ تجيني
سببها الزمان اللي جمع كل زين بشين=وزادت عواكيسه وجاء له معاويني
زمانٍ تغيّر والعرب فيه مختلفين=هذا من يسار السكه وذا من يميني
زمانٍ تغيّر فيه حتى رجال الدين=عسى الله يثبتنا على العقل والديني
وأنا لابغيت أشكي على أصحابي الغالين=أشكوي صحيبٍ بالشكاوي يشكويني
وأنا اليوم سنّدت القضيّه على أبو حسين=حزام الظهور اللي على العسر والليني
ابن سيف سعد حسين راع الجناب الزين=وراعي هلا يامرحبابك ملاييني
صديقٍ صدوق وفالمواقف طويل يمين=وله فزعةٍ تذكر ودينه على ديني
ذرى من تذرابه وصلفٍ على الصلفين=وهذا اسلوبٍ في صعوط المجانيني
متعّبْه أبوه وجملة اخوانه الوافين=طليقين وجه ومن رجالٍ طليقيني
زبون الخساير دون ناصيه وأحمر عين=عريب النسب من ساس روس القحاطيني
أبو حسين معرفتي معه فوق سبع سنين=علوم المراجل كلها بينه وبيني
ومن دون ديني لو خذى الدين فوق الدين=ماهمّه كثر دينه وهمّه كثر ديني
يابو حسين أظن الوضع يحتاج للتحسين=ونشوف الغلط ونقرره فالموازيني
نعرف الخطا من وين مقبل ومقفي وين=على شان مانبلش بالأقصى والأدنيني
هو الوقت وألاّ الناس وألاّ هم الاثنين=أو إنّا فهمناهم غلط كل الاثنيني
تعبنا من التخمين والحكم بالتخمين=تحسب الرجل وافي وتكتشفه بطيني
ردي الروابع فالشدايد وأبو وجهين=أقطّع حبال وصالهم بالسكاكيني
وأنا والله إني خابر ان المهين مهين=وحرار السعه فالضيق ترجع كراويني
لكن ياصليب الراي عطنا الكلام الزين=وطراة القصيدة مع لحنها تلاحيني
[/poem]

وهذا رد الشاعر / سعد بن حسين الحبابي القحطاني

[poem=font="simplified arabic,5,black,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black""]
لفتني قصيدة شاعرٍ يذهل الواعين=يحوز برضى النقّاد لوهم قليليني

قصيدك ياأبو جويعد من أوّل ومن هالحين =قصيدٍ تداوله العرب بالدواويني

تهرّج به العرّاف إلا جاء لذكره حين=
وتغني به الركبان فوق البعاريني

فهلا مرحبا من يوم قاد القصيدة لين
=ختمها ولبّسها من أغلى الفساتيني

تغذى من أفكاره معاني وتمشي بين
=بنات الشعر وإتقول لا أحدٍ يحاكيني 

وتحمل رسالة غامضة مستحيل إتبين
=على أهل العقول المرجفة والمساكيني

وجتني شكيّة راعي الجود طلق إيدين
=وراعي الوفا والطيب سم المعاديني

وربعه سهول في اللقى تحتمي التالين
=لهم في قرارة نجد علم وبراهيني

ليا عدّو الوافين يحسب من الوافين
=ويكرم جنابه من ثعولٍ ردييني

معرفتْك ياابن عبود كنز بلا تثمين
=ومعرفة مثل شرواك بالحيل تغنيني

كلامك قراحٍ في الدهر يسقي المسنين
=ورايتك بيضاء دام أنا وأنت حييني

وخوّتك تاجٍ فوق راسي ليوم الدين
=وأوصي عليك ان مت منه يعنويني

وترى الوقت وأيضا الناس كالسيف أبو حدين=
وحنا غدينا لقمة بين ضرسيني

من اللي تشوف العين يالله عساك اتعين
=وأظن اللذي حاديك في الوقت حاديني

تعلّى المنابر راعي السكر والتدخين=
والأمور المهمة في يدين الوراعيني

ترى وضعنا ذا الحين يحتاج له تلحين=ومن يوم تكويني والأيام تكويني

لا تعطي الثقة ناسٍ بالاشكال محترفين=
ولا تطلب ألاّ ان كان رب المصليني

ولا أقول كل الناس في وقتنا مخطين
=ولاني باقول انهم كذلك مصيبيني

لكن الحقايق بيّنة والصحيح ايبين
=وحنا على ما قال بالله قوييني

وعسى الله يصلح حالنا يالمجيب آمين
=وختام القصيدة بالنفل والرياحيني
[/poem]

السلام عليكم ورحمة الله وبركاته

مبطي مانزلت شي في قسم الشعر

وهذي أبيات للتواصل



لي صاحب ٍ ميّت ضميره وهو حي
ولايميّز من عدوّه صحيبه

دراهمه واجد ومرجلته شوي
ينفع معادينه ويبلش قريبه

ويعد نفسه شي من غير لاشي
والعيب عنده حاجةٍ ماتعيبه

الله يلومه طافي الضو والضي
ماهوب يثبت فالأمور الصعيبه

للمصلحه ينسف كرم حاتم الطي
وعنده مواجيب النشامى تعيبه

مايدري ان المصلحه مالها في
عنّي تقفّي به ويمّي تجيبه

ليت الردى له طب لو كان بالكي
أهم شي إنّا نحصّل طبيبه

لكن بعض الناس عيٍ ولد عي
ولايفتهم فالمخطيه والمصيبه

السلام عليكم ورحمة الله وبركاته

هذي قصيده أرسلها لي الشاعر / سعد بن حسين الحبابي

يقول أبو حسين


راكب اللي دوب صدّر من اعماني
أدهم لونه مثل لون الغمامه

مفخرة لأرض الرفيعه والطماني
ويقطع الدرب الوعر بأمن وسلامه

منوة اللي دخلهم قاصر وداني
وغاية اللي دينهم والفقر قامه

مركب أهل البشت وأهل الخيزراني
والوجاها والكبار أهل الزعامه

جيب لاند كروزر اخيار المقاني
ومحشوم فالبلد واله احترامه

شي من برى وداخل شي ثاني
برمجة تصميم وابداع وفخامه

غابش ٍ الفجر من دار قحطاني
من ديار أهل الوفى وأهل الشهامه

والعصر في العاصمه قبل الذاني
قبل ياتي الليل ويحل بظلامه

نصّه أهل الجود ذربين اليماني
في الجبيله غرب عن بر الثمامه

دار من ربعه وجدانه عواني
والعنوّه عندنا تلزم الزامه

السهول اللي لهم مجد وكياني
صيتهم في نجد بل شرقه وشامه

نصّه اللي بيته لقاصي وداني
ناصر اللي قاضب الطيب بزمامه

مثل حر ٍ شاهر ٍ بأعلى مكاني
ومن حرار لا الخوال ولاعمامه

كلّهم عرّاف وكبار وعياني
قسمهم في الطيب من ذروة سنامه

خصّه ابن عبود متعنّي وعاني
وعند ربعه له وقار وله مقامه

مجلسه بالبن والحيل السماني
اقلط ولابد يفعل لك كرامه

وبعد فنجال بريح الزعفراني
علّمه بالعلم واخذ النا علامه

قل له ان صكات بقعاء والزماني
شيّبت باللي قبل سن الفطامه

ماعلى الدنيا يابو جويعد ظماني
من خلق آدم ليا يوم القيامه

والسعيد اللي على الطاعات كاني
في جبينه من صلواته علامه

يعرف ان عمره على دنيا فاني
ومع هل الطالات مكروب حزامه

والشقي تمضي الدقايق والثواني
مافرق بين الحلال ولاحرامه

وانتبه من بعد مافات الأواني
ولاكسب غير الحسايف والندامه

والختام آحب آبادلك المعاني
ياحفيد اللي يفكون الجهامه



وهذا ردّي عليه


مرحبا باللي على الفكسار جاني
لاتعبت ويالله حيه والسلامه

مرحبابك يانديب المرحباني
تسلم ويسلم بعد ماأرسل سلامه

جيّتك عندي مثل عيد رمضاني
يوم تم الفرض وأكملنا صيامه

وكيف حال ربوعك كبار الصياني
كم كبش ٍ طبخ كبش ٍ في يدامه

الحبابي من عريبين المجاني
من دبي لعالية نجد لتهامه

ربعه أهل سنان فالحرب وعناني
ويدحمون ان زاد فالكون ازدحامه

الرشى لامن مشى فوق السواني
يعرفون أهل الأشدّه والمسامه

كل خيّال ٍ على ظهر الحصاني
مايكز ألاّ كبيرين العمامه

ينطح الفرّيس عيان بياني
لو سهوم الموت من خلفه وأمامه

وأنت لو بلّغت ابن سيف امتناني
فالخوي يعرف خويّه وش مرامه

وقول صح الله لسانك من لساني
والشعر يزهى على صدرك وسامه

شاعر ٍ ماهوب شعره مغلطاني
وناقد ٍ ماهوب ينقد في كلامه

ترجماني مايبي له ترجماني
والقصيد الجزل من جل اهمامه

وماتغزّل فالغواني بالأغاني
حاشم نفسه عن دروب الرخامه

أنت يابو حسين واحد من اخواني
ومثلك وشرواك يعجبني نظامه

جعل يفداك الهدان ابن الهداني
الربيب اللي تراعد به عظامه

ياسعد طير السعد يالصيرماني
حر ٍ مجرّب ولك قومه وقامه

أنت تدري بالزماني القلّباني
بعد ماساوى السنافي بالهلامه

والشجاع أصبح يهاب ولايداني
لايخبط القاع ويثوّر كتامه

والجبان ابن الجبان ابن الجباني
صار خشمه صعب مايقطع عرامه

لكن الدنيا تجارب وامتحاني
ومن بذل جهده نعدّيه الملامه

والحظيظ اللي حفظ سبع المثاني
وسالك ٍ درب الهدى والاستقامه

ماتتبّع غرة فلان وفلاني
ولايحب أهل الوشايه والنمامه

وبالخزامى والنفل والقحوياني
في بداية مابديت وفي ختامه