السهول ,, مجالس قبيلة السهول

السهول ,, مجالس قبيلة السهول (http://www.suhol.com/vb/index.php)
-   مجلس دواويين شعراء المجالس (http://www.suhol.com/vb/forumdisplay.php?f=52)
-   -   ديوان الشاعر / فلاح بن صالح (http://www.suhol.com/vb/showthread.php?t=11818)

ناصر بن عبود 08-26-2007 11:06 PM

ديوان الشاعر / فلاح بن صالح
 
السلام عليكم ورحمة الله وبركاته



ديوان الشاعر / فلاح بن صالح السهلي

ناصر بن عبود 08-26-2007 11:08 PM

المعاني عندنا ريح العطور = من بساتين الوفاء باعمها
لا نظمت القاف والله مايبور =اْرثمه بالوسم وانته سمها
لابتي لابه وانا فيهم فخور = يعتلي مجد المكارم كمها
صيتهم بالعز بانيله قصور = يكرمون الضيف لاجا يمها
الفتى منا على جاره غيور = حافظ سده وعينه غمها
ماشكى جارعلى الشده صبور = جارهم يسعد وهذا همها
نصعد العليا ولافينا فتور = همت الرجال تصعد يمها
لاتعزوا عايلن جاله دبور = نورده حوض المنايا جمها
ذي عوايدنا على مر العصور = يشرب العايل مناهل سمها
يالله اْني طالبك يوم النشور = باليمين كتاب نفسي ضمها



رابط القصيده الأصلي

ناصر بن عبود 09-04-2007 07:24 PM

بسم الله الرحمن الرحيم


السلام عليكم ورحمة الله وبركاته


اليا بتدينا نبتـدي باسـم الولـي=نبدى بذكر اللي عظيمـاً أوحـدا
عزيز شان و بالمكـان المعتلـي=اللي نصر جنده على من اعتـدا
يامرحبابـك ياهجوسـي ونهلـي=علّي قراحـن للظوامـي يـوردا
بنضم عقودٍ بالجواهـر تحتلـي=لامن بدا قاف القصيدة بـا لحـدا
اليا قبلت قحم القوافـي ماعلـي=ببدع سمين القاف واكتب وأنشدا
على بياض الطرس بنسخ ما يللي=في ربعي اللي ذكرهم سقم العـدا
في اللابه اللي فعلهم ما يجهلـي=لامن رفع صوت المنـادي للنـدا
مضى لهم فعـلاً تهابـه عيلـي=تاريخهم يشهـد وكلـن يشهـدا
لا ثارت الهيجا وفارسها سهلـي=تباشرت عكف المخالـب بالغـدا
صـوارم تفتـل ولاهـي تفتلـي=حريبهم راسـه بسيفـه يفـردا
نبطش بكـف لازعلنـا تزعلـي=نلطم عدون مـن حياتـه يزهـدا
حنا زبون الكايـده مـا نعزلـي=نسطي ولا يطلق علينـا شـردا
حنـا كمـا نجـم تعلـى يذهلـي=سود الليالـي مـا تكفـه بـردا
حنا رجـالا ً بالمواقـف نجزلـي=رجالنا يثنـي و لا هـو يجحـدا
خوينا فـي لازمـه مـا نمهلـي=حنا معه لو لازمـه روح الفـدا
نحمل حمول حملها مـا يحملـي=نرسي كما ترسي جبـال بالهـدا
قصيرنا في واجبـه مـا نبتلـي=يلزم علينـا واجبـه مـا نقعـدا
ريف القصير اللي زمانه ممحلـي=مما لنـا ياخـذ ولاهـو يحسـدا
شف الكرم منـا كفوفـه تسبلـي=والشح ماله فـي يدينـا مـزودا
نعطي ولا نحسب وشلـي نبذلـي=سلم لنا يبقى على طـول المـدا
نبني لنا في كـل مجـدٍ منزلـي=منها عيون اللي يعادينـا رمـدا
وأنا أحمدا لله لابتي مـا تخذلـي=قولن على فعـل وقولـن ينقـدا
ولالي على ظلم القبايـل محملـي=كلن على حقـه سيوفـه تجـردا
صلوا على اللي بالرساله مرسلي=نبينـا اللـي بالرسالـه مرشـدا


رابط القصيده الأصلي

ناصر بن عبود 11-08-2007 10:41 AM

السلام عليكم ورحمة الله وبركاته

أعزائي القراء الكرام أسعد الله أوقاتكم

أحببت أن أتواصل معكم بهذه المتواضعه وأتمنى تحوز على رضاكم



اللسان حصان والعاقل فهيم = قبلنا قالوه ذربين الكلام
والهروج اللي من العقل السقيم = مالنا فيها شفوف ولا مرام
البلا في هالزمن ناس حطيم = ترقب العالي ولا فيها مقام
والفعول اللي لها عصراً قديم = راحت رجالاً بها فوق الغمام
باسهم بالراس والراي الصميم = يحتمون القول عند الأحتدام
والنوايا طيبه والله العظيم = ماطبع في جوفهم حسد اللانام
يقطعك ياللي على الساقه ذميم = عزتي للي جعل منه حزام
خايب سده ويمشي بالعتيم = ساري ليلاً تغشاه العسام
المراجل بالهمم خلك هميم = ما يفيد الهون رجالً همام
والطريق الصعب والراس السليم = يوصلك روس النوايف ما تلام

ديوان شعراء المجالس 12-07-2007 01:13 AM

اْستسل سيف القصيده وستواله = طرق بيتن للبقايا مستعدي
لا تهيض هاجسي باللي طراله = زرفلت عطش المعاني يم عدي
عايذن باللي وصوفه من كماله = عن هزيل القول لايكتب بيدي
شفتلي ناسن يقال للهم حثاله = سميت باسم الرجال اللي تعدي
وين ذاك وين هذا وين جاله = للاْسف هذا دبورن مستبدي
يلبس الغتره وينصب في عقاله = لعنبو جده يحسب انها تسدي
عاقبن درب المراجل مامشاله = تقصر يدينه ولايقدر يعدي
ماذكرله بالمجالس نعم حاله = كل رجلا لاسمع ذكره يصدي
أقمحي ياللي عيالك هم عياله = مثل هذا يا جميله مايقدي
لابغيتي معنزن خوذي رجاله = في هجير الوقت تلقينه يلدي
سمعت الرجال تسبقها جماله = لارقى له قمتن فيها تحدي
فاتح بابه ويفرح من عناله = لانصاه اللي ظروفه تستشدي
لاقبلت دهم الليالي لامحاله = أشهد أنه يقمع اللي يستهدي
يبذل المعروف من غالي حلاله = مايحسب للخساير ويش تدي
شاعمن ضوه ومركيها دلاله = مجلسه تلقى به رجالن تودي
هبهبت ريح الكرامه من خصاله = حيلن فوق الصياني جزل مدي
عوده أزرق يطبخ مما جراله = فوق جمره للنشاما يستجدي
أطنخ رأسه ويطمح للشكاله = موجع كبد اللعين اللي يضدي
لين الجانب ولاتبغى بداله = ميزتن يغتاض منها كل ندي
ياصليب الراي ماهيب أستحاله = عرب المنسب ترى عرقه يندي
لايغرك زينها في كل حاله = كم هنوف عند أهلها خذ وعدي
قايله للي يودون الجزاله = واسمن كل القوافي وسم جدي
بالرثام أجمله وأسمل خماله = شاهدي دامع وللخالق مردي





رابط القصيده الأصلي

ديوان شعراء المجالس 01-23-2008 09:14 AM

السلام عليكم ورحمة لله وبركاته

أعزائي أعضاء ورواد منتديات مجالس قبيلة السهول الشامخه

مشاركتي المتواضعه لتواصل معكم تنحني أمام همة أنتظاركم أرجو تنال أعجابكم


ياصافي الود ودك لايجي ضدي = خلك على قلب محبوبك تمناني
ياشوق أنا في غرامك واصلن حدي = كلك على بعض تجري وسط شرياني
لو الغلا ينعزل يامعذبي ودي = بريح الروح من تعذيبك الجاني
يامنيتي غصب حبك صادق وجدي = يدفعني الشوق يمك ونتكس ثاني
أنا غريق المشاعر جزري ومدي = وأنته كما الشاطي اللي يرسي أماني
تدري حبيبي أحبك حب متعدي = في وصفها يعجز التفكير ولساني
نبض المشاعر سريع الدق ولعدي = خفقات قلبي تسارع رتمها باني
يهتز فيني كياني قبل ما لدي = في صورتك داخل أعماقي ووجداني
يامهرة العشق عشقي سامره ودي = ليل الهوى يلعب المنكوس بالحاني
يطرب لسمعه بنات الفكر وتردي = قوافياً في هواكم يأجمل أوطاني
عذب القوافي حبيبي تكتبه يدي = مافيه بيتاً يلوق الى لكم جاني
شامخ غرامك يبيح خافي السدي = لجلك حبيبي سرجت الشعرلك عاني
أما اوصله بالعطا تعطي وهو يدي = ولا عسى الله يخلفه راح مجاني
أسمع نهاية كلامي يالهوى الندي = بين القوافي تلاقي أصدق أشجاني


وسلامتكم دام عزكم

ديوان شعراء المجالس 03-01-2008 09:39 AM

السلام عليكم ورحمة الله وبركاته

لتواصل وأتمنى ترقا الى ذائقتكم





السنين طوال عابرهـا محـال = والمواطن جافيه والنـود غيـر
العطاء ياخـذ ولا يقبـل جـدال = والعمى يطغى على قلب الضرير
الشجاع ايهاب من شر النـزال = والغرير يموت من حد الشطيـر
ترتوي منها ولا تشـرب زلال = المصير يفوح من شد الهجيـر
كم شعرنا بالخجل والهـم طـال = نرتمي في غي لاهبـة السعيـر
ياظلام الحلم في جنـح الليـال = السيوف أحداد في عنق الفقيـر
يجتمع فيها شتاتـي والسـؤال = عن مضامي عذب وراد الغديـر
أسفرت كل النجـوم إلا الهـلال = ماضواه النور حتـى يستنيـر
اكتم الآهـات لا جـار الخيـال = قبل يظهـر كـل علـم للأثيـر
وأطلق أعنان الجنوبي للشمـال = واستبيح العذر للقلـب الكبيـر
وان سألني وجه مخذول الرجال = قلت له باير عشيرٍ في عشيـر
كان حبه جم ومنـاه الوصـال = هو شعاع النور في حجر النظير
هو كليل الورد لا نـادى تعـال = تسبقه نسمة شذاهـا والعبيـر
يلتطم موج المشاعـر بابتهـال = يخفق الخافق قبل رجله تسيـر
منتحي حبه وشوقـه لا يـزال = ماكنٍ خلف الحنايـا لـه زفيـر
ياعسوول النطق ياوصف الغزال = التفت للي من أسبابـك خطيـر
تحتضر فيـه الأمانـي للـزوال = أنعشـه وإلا تـولاه النـذيـر
بلسم المجروح يا زين الـدلال = لاحتضن جيدك مشاريه الضمير
وانثنى فارع قوامك واستمـال = وارتشفنا ذبّل الوجـد الوفيـر
يالله إني طالبك حسـن المئـال = واغفر ذنوبي وتّبعني البشيـر



لكم تحياتي

ديوان شعراء المجالس 03-21-2008 01:29 AM

قصيدة الشاعر: محمد المرقاع الموجهه للشاعر فلاح بن صالح

حالي يبو صالح غدا بين نارين=نار الهجر والشوق حالي عطيبه
غرون ذبحني والسبب نظرة العين=وانا اشهد ان العين ..هي المصيبه
ايام ردف ايام واليوم ...عامين=ماله وله بيّه.. ومالي ولي به
كل ما تذكر هاجسي ضاق.. من حين=وضاقت علي دنياي لو هي رحيبه
اقفت به ايام الزمن قد له اسنين=وعيّت علي ادهور وقته.. تجيبه
قالوا نديبك ..وجهّه يمّة الزين=عسى حبيب الروح.. يرحم حبيبه
وهذي ثلاث اشهورمن عقب شهرين=اسهر واصابر ..ماوصل لي نديبه
وحالي عنا ياخوك مر العذابين=واعزتي لي راح حالي ضريبه
يهيم فكري وين!!مدري على وين!!=وهو السبب ياخوك..ربّي حسيبه
وهلت عيوني..وانسكب دمعها لين=جفّت..عسى ماصاب عيني يصيبه
غرون حدا حالي على حادي الشين=عقب المعزه ذقت.. مر الغليبه
وحالي يبو صالح غدا بين نارين=نار الهجر والشوق ..حالي عطيبه
انخاك انا بالصوت مرّه..وثنتين=عسى مريض الحظ ...يبرى نصيبه
رد الخبر واضح ..امفصل ابتبيين=وانا اخبرك.. حلال راس الصعيبه
حالي غذاه الشين..واستصعب البين=والحق رفيق الدرب.. قبل المغيبه


رد الشاعر فلاح بن صالح على الشاعر محمد المرقاع:

قافٍ لفاني من سلايل سلاطين = أهل الكرم والجود وهل النجيبه
ربعاً على الطاله سواة الميامين = كم فارس ٍ من ضدهم شق جيبه
يا مرحبا بك يا محمد ملايين = ترحيبتٍ ريح الورود تحضيبه
لاهبها الغربي بوسط البساتين = يفوح عابقها سلام و تجيبه
الشعر لك ياصاحبي بالميادين = يرفع لك البيضاء براس الرقيبه
شاعر ولك مبدى وبحر ومضامين = عذب القوافي من هجوسك لبيبه
تغوص في غبات غالي التثامين = والنادره هي عادتك والكسيبه
وأنا على خبرك سعاط المجانين = أزمي على موجات زف الجذيبه
والشعر لي غايه وفكره وتلاحين = شرد المعاني نظمها نرتقيبه
واليا بغيت من الهواوي عناوين = أسمع بفصلها ولاهي غريبه
اليا صفا لك صاحبك بالبراهين = جود وثاق العهد لا ترتخيبه
خلك بشرع الحب راعي قوانين = لا تخلفك هقوات ظنك غصيبه
ولي نقض عهد ك وطاع المعادين = فرقاه عيد ولا تمنى نصيبه
خله يولي والعوض بالمزايين = بنات روس القوم لامن حكي به
عكش الرموش معذبات المهاوين = من شافها منهم يجر النحيبه
اليا هرجت كن الحكي بالموازين = مثل الذهب يوزن وغالي مجيبه
ما هيب ثرثاره بهرج النساوين = ولا تلحق أعرض البشر والقربيه
والعنق عنق اللي تقود الجوازين = ظبي ٍ خلقها الله صوره عجيبه
والجيد فارع والعذارى مجانين = كلن تبي وصفه وهذي وهيبه
والعين عين اللي ندر بالشياهين = ولا كما عين الحرار المهيبه
وأرق السنود ولا تهاب البواطين = وانا لها يالقرم نعم الشبيبه
فيما تبي يا صاحبي دوم وافين = نقدم على الكايد وغصبٍ نجيبه
حاضر بحاضر وابشر اليوم ماشين = رهن الاشاره صاحبك بالزهيبه
يحرم علي أن كان قولي هذارين = شرب المهيل من دلالٍ عذيبه
والخاتمه صلوا على خير هادين = نبينا اللي بالمعارج رقيبه

( رابط القصيده الاصلي )

ديوان شعراء المجالس 04-04-2008 06:59 PM

يسعد مساك ويسعـد الله لياليـك = ويسعد مساء ذاك الجبين البهيـا
يسعد صباحات الهناوالغلا فيـك = ويسعد صباحات النسيـم العذيـا
في كل عامٍ يـا حبيبـي بهنيـك = ودعي من أعماقي يديمـك هنيـا
إي والله انك مطغـيٍ ود مغليـك = يا نرجس أيامي وضكـة شفيـا
يافرحة المشتاق لاصافـح يديـك = يا جوهر أشواق الغـرام النديـا
يستانس العاشق على نظرة عنيك = لابحر بها ثم أحتضنهـا شويـا
يلمه المرفـا ويلقـى شواطيـك = يرسي على كتف الحنان الوفيـا
يمد لك شوق الشفايـا المهاليـك = ويعل من صافي الثمـان الرويـا
يقبّل الثغر الرضـي ويتساميـك = ويعيش بك حلم الأمانـي سويـا
يفل مجدول الشعر لاجل يضفيـك = يكسي بها طلع الثمـار الصبيـا



رابط القصيده الأصلي

ديوان شعراء المجالس 05-16-2008 12:35 AM

السلام عليكم ورحمة الله وبركاته

أعزائي القراء الكرام أسعد الله أوقاتكم

لتواصل معكم هذه المساجله من الأرشيف أرجو أن تحوز على رضاكم

وهي بيني وبين معالي وكيل الحرس الوطني الأستاذ / عبد الرحمن أبو حيمد

وقد أسندت عليه قائلاً


الا محلى قصيد ٍلك قريته محكم التجويد = يداوي لهفة المشتاق بأبياته وتكوينه
نزع روح الخمول وعانق النشوه مع التغريد = له الفرحة تغرد به طيور الوسم تلحينه
ألا ياصاحب المعلى بكل معنى وكل تأكيد = رسم لك والدك دربك وجدانك مسوينه
رسم لك منبر الحكمه مشيتبها مع التوحيد = جعلة الخالق الواحد أله ٍ حافظ ٍ دينه
خذيت الصبر لك درب ٍ تحلابه ولأنت وحيد = ولو جارت بك الايام وخل ٍ مدعج ٍ عينه
عسى عمرك تهنابه وعمرك بالسنين يزيد = أبشكيلك عن أحوالي وحب ٍ طالت سنينه
رجيت بها الأمل يضوي تفرحني ليال العيد = تجمعنا بشرع الله ينور دربنا وينه
ثمان سنين به هايم وأنا مدري متاه يفيد = متى يرسم على أشفاه الحزن ببها تلاوينه
يشيب الراس من صبري وحلمي بالحياه بعيد = يسير العمر باللآهات وضاعت كل عناوينه


فأجابني قائلا ً


تصبر والطلب المولى ولا تتعب من الترديد = عسى لك دعوة ٍ تقبل تعدل الحظ وتزينه
ترا حب الحبيب أنقى مع المده يصير أكيد = تحكمه فكرة العاقل ويوزن في موازينه
الى ضاق الأمل ساعه فساعات الفرج بتزيد = تجي للي توكل والصبر وسع مخازينه
تحرك في أتجاه اللي عليها همت بالتحديد = صقور البر لا شاف الحباري صاد في حينه
قريض الشعر تسلايه وأشوفه لي كما التغريد = ولا أبين معاني مقصدي وأخفي بواطينه
معك بالراي والعزوه ولا نرضى تكون وحيد = طباع أهلي وجداني لمثلك رأي ونعينه
جمعنا الدرب والخوه جمعنا منهج التوحيد = وجمعنا الموطن الغالي عرقنا أسقى بساتينه



وسلامتكم

تقبلو تحياتي وتقديري




رابط القصيدة الاصلي


الساعة الآن 05:01 AM

Powered by vBulletin® Copyright ©2000 - 2019, Jelsoft Enterprises Ltd. TranZ By Almuhajir
HêĽм √ 3.2 OPS BY: ! ωαнαм ! © 2010

جميع مايكتب في مجالس قبيلة السهول من مواضيع ومشاركات تعبر عن رأي كاتبها فقط ولايعبر بالضرورة عن رأي الإدارة

a.d - i.s.s.w