روابط مفيدة : التسجيل | طلب كلمة المرور | تفعيل العضوية | طلب كود تفعيل العضوية | إتصل بنا   



قبيلة السهول مساحة اعلانية مساحة اعلانية مساحة اعلانية مساحة اعلانية

الإهداءات


العودة   السهول ,, مجالس قبيلة السهول > المجالس الأدبية والتراثية > مجلس الشعر والمحاورة > مجلس دواويين شعراء السهول القداما وكبار السن
 


ديوان الشاعر / رشيد بن مساعد القباني السهلي

يشمل قصائد شعراء السهول القداما , وقصائد كبار السن من الشعراء الاحياء ..


إضافة رد
 
أدوات الموضوع انواع عرض الموضوع
قديم 12-25-2010, 08:02 PM   #21
|مساعد رشيد السهلي 
عضو جديد


مساعد رشيد السهلي غير متصل

بيانات اضافيه [ + ]
 رقم العضوية : 10082
 تاريخ التسجيل :  Dec 2010
 أخر زيارة : 03-16-2012 (07:06 AM)
 المشاركات : 39 [ + ]
 التقييم :  25
لوني المفضل : Cadetblue
رد: ديوان الشاعر / رشيد بن مساعد القباني السهلي



يسم الله الرحمن الرحيم
هــذة الـقـصـيدة قـالـها الشـاعر/ رشيد بن مساعد القباني السهلي بمناسبة زواج/ مبارك بن فهد النويف القباني السهلي في دولة الكويت وذلك يوم الآثنين 4/10/1431 الموافق13/9/2010للميلاد
يـم ابـو مبـارك توجـهنـا شمـــالي=فـي لـزومـه عنـدنا الفرجة قصيـرة
الفـجـوج انـسجهـا لـوهي طـوالي=مـانـحـســّب للـمـشـاويـر الخـطيـرة
صـبح يـوم الآحـد شدينا الرحالي=سـارحـين مـن بلـد صقر الـجزيـرة
والمساء في دار شهمين الرجالي=الـصــبـاح اللــي حــسانـيهم كثــيرة
والعشاء عندالشلي ريف الهزالي=عنـد بـن صديـان فـيصل كثر خيرة
والـنهايه عـند مـدغـوش الـعيالي=ابـن نـويـف جـعل يــفـداه الـــعـثيرة
وربـعـهم لـخيار وافين الخصالي=كـاسـبين الـمدح اهـل شيــمه وغيرة
مـن بـنـي قـبـان مـنفـدة الـحـلالي= لابــة يــاســعـد مـنـهـم لــه عـشيرة
السـهـول مـطوعّة من كان عالي=يـلــطمـون الــشره لاجنـب مسـيرة
لاحـصل يـوم يـطـول به القتـالي= خصمهم من ضربهم يشمت مشيرة
فـي نـهار الـضيق ينجون التوالي=كـم عـدو فـي اللـقـاء حـاسـو مريرة
كنهم في الهوش صايكة الجمـالي=الـرجـال اللـي يــصـدون الـمـغـيـرة
ويـنفدون المـال في عسـر الليالي= فــي زمـان الـشـح والـعـالـم فـقـيـرة
ولانـسيـت سـبيع مروين السلالي=نـصرة المـضـهـود في يوم الكسيرة
كـم رعـو فـي خـايعً قـفـر وخالي=مـانـزِل مـن خـوف قـيمـان شـريرة
قـافـر مـاديـج بـه مـن يـوم سـالي=زايـف عـشـبـه يـغـرد فـيـه طـيــرة
فـي عـثـامـيـره يـسـجون الـمتالي=ولارهـجهم خوف لو جـاهم نـذيـرة
مـن غـزاهـم سـأيـقه زود الهبالي=الـهـزيـمـه والخـسـاره هي مصيرة
قـلـته ولااقـول حـزنـا بـالـكمـالي=كـلـن لـكسـب الـوفا يـشـعـب بعيرة
الـصـحـيـح يـعد والـواقـع يـقـالي=الـقبايل وافــــيـه فــي كــــل ديـــرة
قلـت مـن زين المثايل ماطـرالي=ولابـغـيـت الـشـعر قـافي ماسـتعيرة
تم قـولـي يـاكـريـمـيـن الـسـبالي=والـخـتـم نـرجـي مـن الله الـسـتـيـرة
يـاكـريـم كـل خـلـقـه لـه تـسـالي=عـالـم مـاكـان نـعـلـن والـســريـــرة
يالـعـزيز الـمقتدر ياذا الـجلاالي=ربـنـا اللــي مــالـنا مـعـبـود غـيـــرة


 

رد مع اقتباس
قديم 12-25-2010, 08:17 PM   #22
|مساعد رشيد السهلي 
عضو جديد


مساعد رشيد السهلي غير متصل

بيانات اضافيه [ + ]
 رقم العضوية : 10082
 تاريخ التسجيل :  Dec 2010
 أخر زيارة : 03-16-2012 (07:06 AM)
 المشاركات : 39 [ + ]
 التقييم :  25
لوني المفضل : Cadetblue
رد: ديوان الشاعر / رشيد بن مساعد القباني السهلي



قصيدة الشاعر // رشيد بن مساعد القباني السهلي

قالها عندما سمع شخص يمدح شخص لايستاهل المدح



يافلان ابـن فـلان غلطـان يافـلان=مدحك لذاك الشخـص ماهـوب قـدّه
مدحك لذاك الشخـص زور وبهتـان=يومـك تعرفـه هـات فعلـه وعـدّه
المـدح يزهونـه طليقيـن الايـمـان=أهل الوفاء لاصار فـي الوقـت شـدّه
كسّابة الناموس من مـاض الازمـان=كِـرام الايـادي والمعـادي تـصـدّه
والا الـردي ياخيبتـه حيـث ماكـان=عـن مجتمعنـا جعـل ربـي يـلـدّه
نذل علـى ماقيـل محـواج نسـوان=طير الرخم ما ربح مـن هـو يهـدّه
ما يمـدح الا اللـي يسمـى بليهـان=النشمـي اللـي كـل نــبّ يـسـدّه
احصان مايزعلـك لا قالـوا حصـان=لاطـوّل المـيـدان مـابـاح ســدّه
يعجبك فـي كـل المواقـف كحيـلان=لامنـه صـار العـلـم هـاتـه وودّه
ترى الردي مايقضي النـوب كوبـان=حتيـش لامـن طـاب خالـه وجـدّه
مايقضي اللـزوم لاصـار لـك شـان=برقـة سـراب بقيـعـة مجـرهـدّه
مامنـه زود بـل شــر ونقـصـان=عنّا عسـى اللـي يقلعـه مـا يـردّه
عسـاه يمحـى محيـة العـج دخّـان=يخلـي جميـع الـدار والكـل ضـدّه
ينفى من أقصى طريف لا سوق نجران=ومن منطقة سلوى إلى غـرب جـدّه


 

رد مع اقتباس
قديم 12-25-2010, 08:29 PM   #23
|مساعد رشيد السهلي 
عضو جديد


مساعد رشيد السهلي غير متصل

بيانات اضافيه [ + ]
 رقم العضوية : 10082
 تاريخ التسجيل :  Dec 2010
 أخر زيارة : 03-16-2012 (07:06 AM)
 المشاركات : 39 [ + ]
 التقييم :  25
لوني المفضل : Cadetblue
رد: ديوان الشاعر / رشيد بن مساعد القباني السهلي



قصيدة للشاعر/رشيد بن مساعد القباني السهلي
موجهه للاستاذ/فايز بن تركي بن رشود القباني عندما كان محافظ لمحافظة الحريق




بديت باسـم مدبـر الكـون كلـه=رب الملى محيي العضام الرميمـه
ومن بعده احضرت القلم والسجله=واكتب بيوت من الشوايب سليمـه
قـاف جزيـل سامعـه مايمـلـه=تفهـم معانيـه الرجـال الحكيمـه
مايتعب اللي فـي لزومـي يشلـه=ملفاه ابوتركي حريـب الجريمـه
لاجيـت فايـز يانديبـي فقـلـه=لعـل تفـداه العفـون اللئيـمـه
لامن لفيتـه قاصـده فـي محلـه=عنـك يـزول الهمـوم الوخيمـه
بشـورك حجـاج طليـق يفـلـه=وصفر الدلال اللي تقلـط مديمـه
كسب المراجل من صفاته اجبلـه=طيبه وراثه مـن جـدود قديمـه
هـداج تيمـاء والثنـا مستغـلـه=كرم وحلم وحسن خلـق وشيمـه
رجل وفـي والوفـاء عـادة لـه=من ماح دلوه ذب ذيـك الخريمـه
من صار مياحه وهو صافـي لـه=تشرب وروده ماتصـدر محيمـه
مصقول هند يعجـب اللـي يسلـه=تحوشبه وقـت اللـزوم الغنيمـه
حـر جـزوع مايـروم المـذلـه=صيده جـزال مايصيـد الهليمـه
المرجلـه يلقـف لهـا ماتـزلـه=جمل ثقيـلات العـدل ماتضيمـه
عـد رسيـن لـه ورود تـدلـه=طرقه توردك الـرواء مستقيمـه
على مشاريـف القـذال المطلـه=تنشر له البيضاء قـوي العزيمـه
بيضاء كما شمس الضحى المستقله=لامن تجلت واشرقت عقب غيمـه
هبت هبوبه والسعد ضاحـك لـه=ولاهوب يرضا للرفيق ابهضيمـه
المدح لو ان من بغـاه ايحصلـه=كان الثعل له صار هيبـه وقيمـه
المـدح للـي تاعـب وشاقيـلـه=هشهوش بهلـول يمينـه كريمـه
تـم الكـلام وفيـه ماقلـت زلـه=وادخل على الله من كلام الضليمه


 

رد مع اقتباس
قديم 12-25-2010, 08:39 PM   #24
|مساعد رشيد السهلي 
عضو جديد


مساعد رشيد السهلي غير متصل

بيانات اضافيه [ + ]
 رقم العضوية : 10082
 تاريخ التسجيل :  Dec 2010
 أخر زيارة : 03-16-2012 (07:06 AM)
 المشاركات : 39 [ + ]
 التقييم :  25
لوني المفضل : Cadetblue
رد: ديوان الشاعر / رشيد بن مساعد القباني السهلي



السلام عليكم ورحمة الله وبركاته
هذي قصيدة الوالد: رشيد بن مساعد السهلي إهداء للأخ : بدر بن زيد العبودي الشريف
واللي يقراها بيعرف المقصود منها ولكن انا بوضح المعنى باختصار
الوالد له مزرعه في بلدة حراضه وجاها ما جاء المزارع الثانيه من شح في المياه وعلم بذلك الاخ بدر وقال للوالد انا ما أعتبر المزرعه الا حلالي بس انتم عزموا وانا بجيب الفرار (الحفار) وبحفر والفلوس لاتشيلون همها عطوني اللي عندكم والباقي بعدين متى ماجاء عندكم وتم حفر بئر عميق والحمدلله وجدوا الماء والمزرعه الحين في افضل حالاتها بفضل الله ثم بفضل بدر العبودي اللي يستاهل أكثر من هالقصيده واتمنى ان تستمتعوا بها




بيض الله وجـه ابوزيـد العبـودي=عـد ماهبـت ذعاذيـع الشمـالـي
وعدة الاحجـار ورمـال النفـودي=وعـد ماتمطـر هماليـل الخيالـي
الشلي يشفيك لـو نـازح جـدودي=مثل بدر القـرم مدغـوش العيالـي
والـردي لوتزهمـه مافيـه فـودي=مايسـرك لـو رفيـق لـك موالـي
الشلـي حبـل يـوردك الـعـدودي=والردي يوصف مثل رمث الحبالـي
صحبة اهل الطيب ترقابك سنـودي=من الوطى ترقيك في روس العوالي
والـردي لاتصحبـه مامنـه زودي=مثل ماتبنـي علـى جـرف هيالـي
يالهنوف منقضـة شقـر الجعـودي=اطمحـي للقـرم ياشبـه الغـزالـي
للعبودي بدر جعله فـي الوجـودي=جاره الله مـن صواديـف الليالـي
يوم عطش الحيش وانهارت اجهودي=ارسل الفرار وارخـص كـل غالـي
ولا طلب منـا نقـدم لـه نقـودي=قال جدوا في العمـل هـذا حلالـي
باذر المعروف مانـي لـه جحـودي=بالثناء نجـزاه لاجـاء لـه مجالـي
ومدحنا لـه ماتجاوزنـا الحـدودي=ولاسهجنـا حـد وافيـن الخصالـي
ماهضمنـا كـل شغمـوم صمـودي=من الخطأ ندرى صناديـد الرجالـي
قصدنا ناس عن الواجـب تحـودي=في سبيـل الخيـر ماتنفـق ريالـي
القلوب من الحقد والغيض سـودي=واليدين قصـار والالسـن طوالـي
والمراجـل دونهـا طـرق تكـودي=ماتهـون الابعـزم ودفـع مـالـي
ولا بكـل يدفـع المـال ويجـودي=كود من يسعد بحـظ وطيـب فالـي
قاله اللي ماصحـب كـل معقـودي=طمعته صحبـة كريميـن السبالـي
وختمها مسك وورد وطيب عـودي=وحكمة المعنـى لهـا يرتـاح بالـي


 

رد مع اقتباس
قديم 12-25-2010, 08:51 PM   #25
|مساعد رشيد السهلي 
عضو جديد


مساعد رشيد السهلي غير متصل

بيانات اضافيه [ + ]
 رقم العضوية : 10082
 تاريخ التسجيل :  Dec 2010
 أخر زيارة : 03-16-2012 (07:06 AM)
 المشاركات : 39 [ + ]
 التقييم :  25
لوني المفضل : Cadetblue
رد: ديوان الشاعر / رشيد بن مساعد القباني السهلي



قصيدةقالها الشاعر رشيد بن مساعد القباني السهلي, في رئيس مركز الستارة بمحافظة الأفلاج : سعد بن محمد بن ذيب آل ذيب القباني( وذلك عندما زاره بالمستشفى أثر وعكة صحية ألمت به)





الله يـردك سالمـن ياأبـو خـزام=وعسى نشوفك في شعيب الستـارة
عسى تغادرغرفتك بالشفـاء تـام=تمشي ورجلك من مرضها مجـاره
تمشي سـوي بالظهيـرة بالأقـدام=ونلقـاك لا منـا نوينـا الزيـارة
وقت وترى لابـد للعمـر صـرام=ولابد من عقب الحـلاوة مـرارة
الأنسان لو طالـت لياليـه مـادام=لابد مـن قبـرن يهايـل غبـارة
وإلا الفتى ياكود رقعه مـن الخـام=ماينفعـه كثـر الولـد والتجـارة
صحيفة تطوى بعد رفـع الأقـلام=والخاسر اللي صحيفته في يسـارة
في موقف فيه يتناجون الأخصـام=يوم عبـوس فيـه أشـد الحـرارة
يومن تعادل وقفتـه عـدة أعـوام=ويآخذ به المظلـوم حقـه وثـاره
الأمـر للـي للخفـيـات عــلام=موحي دبيب النمل فوق الحجـارة
ماهوب غـدار ولا هـوب نمـام=ملك الملوك اللـي رفيـع وقـاره
والرابح اللي ميتتـه ميتـة اسـلام=يروح ماحـس القرابـه وجـاره
صلى الفروض وقام يزكي وصـام=ومع الاستطاعه حج وأكمل جماره
وقـام التهجـد والمخاليـق نيـام=مع مثلها ركعـات فـأول نهـاره
وخلق حميد وجو في وصل الأرحام=والبعد من هضم البشر وأحتقـاره
هذا وتسلـم مـن مقاديـر الأيـام=وعلى سلامتكـم نسـوق البشـارة
ياكاسب الطولات يانسـل الأكـرام=يالنادر بن الحـر سـاس النـداره
تنشر لك البيضاء من العبر للشـام=ياكاسب الطولات في كـل شـارة
لامن نخاك اللي من الوقت منظـام=فزعت من زود الصطر والنعـاره
هذا الصحيـح ولا نقولـه توهـام=وآخير من كثر الكـلام اختصـاره
صلوا على اللي قام بأعدام الأصنام=ليلة اتاه الوحي في وسـط غـاره


 

رد مع اقتباس
قديم 12-25-2010, 09:19 PM   #26
|مساعد رشيد السهلي 
عضو جديد


مساعد رشيد السهلي غير متصل

بيانات اضافيه [ + ]
 رقم العضوية : 10082
 تاريخ التسجيل :  Dec 2010
 أخر زيارة : 03-16-2012 (07:06 AM)
 المشاركات : 39 [ + ]
 التقييم :  25
لوني المفضل : Cadetblue
رد: ديوان الشاعر / رشيد بن مساعد القباني السهلي



في سنة من السنوات كان في قريةالفرشة أحدى قرى القبابنه السهول رجل من الجنسية اليمنية اسمه علي بن أحمد القطمي السيفي ويلقب بأبوعبدالله وكان يعمل في ورشة تابعة لفلاح بن فالح السهلي وكان له أبناء اخت إثنين وكانوا في قرية العليا وصار لهم حادث على مثلث قرية العليا وحفر الباطن والنعيرية وانتقلوا إلى رحمة الله تعالى.
وعندما علم ابوعبدالله بوفاتهم إتجه إلى فلاح بن فالح وأخبره بالموضوع وطلب منه الفزعة وكانت سيارة ابوفالح ليست معه في ذلك الوقت فذهب إلى اخيه حمد بن فالح رحمه الله فأخذ سيارته وأتاهم الشاعر رشيد بن مساعد ليذهب معهم لكبر مكانة ابوعبدالله عندهم ولكنهم حلفوا عليه بعدم الذهاب واتجهوا إلى الشيخ فلاح بن ماضي السهلي وأخذوا منه ورقة تعريف ثم ذهبوا إلى قرية العليا واتجهوا إلى المستشفى مباشرة وأنهوا كافة إجراءاتهم وأخذوا المتوفين وغسلوهم وكفنوهم وصلوا عليهم ودفنوهم.....

وبعدها قال هذه القصيدة الموجهة للشاعر/ رشيد بن مساعد القباني السهلي


أنا أول كلامـي قلـت ياحـي يـارواف=وياعالـم الظاهـر ويافـاهـم الخـافـي
سماحك وغفرانك طلب عبـدك الخـواف=متى فاض روحـه بعـد ماكـان متعافـي
عسى يا من أمرك والقضاء بين نون وكاف=تنزل ذنوبي والخطأ مـن علـى اكتافـي
وانا البارحه عيني تعيف النعـاس اعيـاف=واجر القلم واكتـب بيوتـي علـى قافـي
تذكرت خوّت من سكنهم هجـر وريـاف=هل الطول واهل المرجله كمّـن سنافـي
وانا من صداقـة خايبيـن النبـا حـلاّف=واعاشر رجال اسلومهم عـدل وانصافـي
بفضل الله اتجنبـت درب الـردا عفّـاف=واحب الوفا والصدق لـو دونـه اتلافـي
ولي ربع فالفرشة يفوقو علـيّ باضعـاف=لهـم فالمجـالات الحميـده نبـا شافـي
هل العز والناموس تفـزع مـع الهتّـاف=في الضيـق والشـدات مكيالهـم وافـي
رجال الكرم والجود والضيف والمضياف=ومن غاب منهم يعتبر من حضـر كافـي
يقوله مجرب ذاق مـر الزمـان اصنـاف=نهار القدر ساقـت علـى ربعنـا لافـي
وابوماضي اسعفني بذاك الخطاب اسعاف=له البيض تنشر من علـى كـل مشرافـي
ركب موتره واشمر مع مالصباح اشتـاف=وابوفالـح اتحمـل مراحـي ومعطافـي
يدل المناطق والمراكـز بـدون اوصـاف=تقـول ان راسـه كمبيوتـر وجغـرافـي
وجاني رشيد وقال لـي ماهنـاك خـلاف=لزومك ترى بقضيه لو رحت لـه حافـي
وانا اعتز واتشرف بخوّة رجال اشـراف=سواليفهـم وطبوعهـم قـمّـة أهـدافـي
على الجوده اتربوا يوم السنيـن عجـاف=وعـاد المطايـا تنقـل افـراد واردافـي
لهم حظ وافر في الشبب من ورى لاسلاف=عيال الحمايـل مـا نفـى علمهـم نافـي
سلامي لهـم مايلمـي البـارق الرفـاف=وماهـل مزنـه مـن غزيـرات القنافـي
ووجدي عليهم مثل ما الحاشـي الميـلاف=إلامن ورى البل حـده الراعـي الجافـي
إلامن قيده وامكن رباطه وحـط أشنـاف=ولاهو بداهـل حـد يـرده مـن العافـي
قعد يلتوي فالربط يـوم أدبـر المحظـاف=بغى البل ودون البـل تماطيـر واشعافـي
وياحـز قلبـي حـزة السلـف بالحـذاف=في الموتر اللي يشتغـل وانثنـى طافـي
وراحت سنون الترس حتى غدا مستـاف=تعطـل ولابـه حـول سواقـه اسعافـي
على اللي حتفهم حكم رب الملا الحتـاف=مشل وسعد وحمـد حميديـن الوصافـي
عساهم في الفردوس العلا وحور الطـاف=ومسكـن طبيعـي لا ببـارد ولا دافــي
طلبهم محضـر والفواكـه لهـا قطـاف=ونهر اللبن جاري ومثلـه عسـل صافـي
وكم غيرهم تبقى عليـه الكبـود ارهـاف=ورى الجود يذري من على قبره السافـي
ورب الخلايق مـاورى حكمـه إستئنـاف=وله كل مايعطي واخـذ وامـره الضافـي
واصلي على طه النبي ماقـرو العـراف=وماطاف بأركـان الحـرم كـل طوافـي



وكان الشاعر يتوجد على مشل بن مساعد وسعد بن ضويحي وحمد بن فالح رحمهم الله جميعا



ورد الشاعر/ رشيد بن مساعد القباني السهلي بهذه القصيدة





لفانـي بيـوت هيضتنـي وانـا مشعـاف=مع الفاكس ساعة جات قلبي لهـا زافـي
كما زاف روض علـه الوابـل الهتـاف=عليه أنتثـر مـن غـر الامـزان هتافـي
بيوت جزيلات المعاني مهيـب ضعـاف=تفوق الجواهـر بالثمـن عنـد صرافـي
على جيها لـو بشرونـي باسـوق آلاف=ولاكـان ربـي ماومرنـا بالإسـرافـي
لفتني من القطمي وقدنـي علـى ميهـاف=نحو خاطري ينقـاد للصاحـب الصافـي
وساعة قروا مضمونها صار بي خفخـاف=وجفني سهر مـن لـذة النـوم متجافـي
وغدى وسط صدري مثل طبل معا دفـاف=إلامنـه دقـه ليـلـة الحـفـل دفـافـي
يطقه شطيـر شاقـه الصـف والعـزاف=وطالـع بعينـه مـن المزاييـن غريافـي
ومن شافني يقـول فـي عقلـه إختـلاف=أسجم وكـل فـي لذيـذ الكـرى غافـي
وأنا أنوب عن ربعي بـرد التحيـة كـاف=تحيـة طويـل عمقهـا قطرهـا ضافـي
هلا بالرسالـه عـد منهـو لمكـة شـاف=وعدد مابرق من ناشـي المـزن كشافـي
أنا أفـز لامنـه لفانـي جزيـل القـاف=ما أحب البيوت إن صار فيهـا تعجرافـي
وياراكب اللـي لامشـى للجلـد خطـاف=إلامـن عطـى دو غـدا لـه ترشـافـي
أمير الجيـوب وسايقـه نشمـي حـواف=وملفـاه قــرم للمناعـيـر مضيـافـي
يوصـل علـي مثايـل صعبـة الـولاف=جزيلـة وقلبـي للجـزيـلات ميـلافـي
ترى عوص لانضا لاتعصت لها عسـاف=وأنـا للمثـايـل لاتعـصـن عسـافـي
مير السابق الاول لحلـو الزهـر قطـاف=والاخير دايـم حقـه الـدوس وعذافـي
ألا ياعلي حامي الركايـف وهـن زلاف=لامن أشهـب البـارود جالـه تقصافـي
وياعيدهن لامـن اقبلـن كنهـن اقـراف=تسالس باهلهـا هزلـة عقـب لصلافـي
ترى ماعليكم زود ياملتجـى مـن خـاف=طموحيـن للعليـا عزيزيـن واشـرافـي
تراكم هل المعروف من عصر وقت طاف=لكم موقف في مـا مضـى نعـم ميقافـي
لكم ياعلي صحايف من العيـوب نظـاف=عن العيب ودروب الردا بيض ونضافـي
نـوادر حـرار فـي مخاليبهـا لاتـلاف=في وقت الهـدد لطماتهـا مالهـا رافـي
تصدون الأعداء في اللقاء والجموع أرداف=إلامن حصل صولات من بين الأطرافـي
ترى العين يالقطمي فراش لكـم ولحـاف=أقولـه وأنـا لاقلـت مانيـب زهـافـي
لكم بالـوداد إقلوبنـا والكبـود صخـاف=غلاكم طبـع بصدورنـا بيـن الأنجافـي
عسى نجتمع من قبل يبطش بنا القصـاف=أمـر الله تـراه بنطقـة النـون والكافـي
ترى العود يضرم لوتنبنب وطال وغـاف=وتـرى ياعلـي للعمـر طـارد ولقافـي
وصلاة عدد ماغـرد الـورق بالغطـراف=على المصطفى ماناظة بروق الأصيافـي
وعدد من لقط جمرات من بعد الانصراف=وكمل شروط الحـج وأنـوى بالإنكافـي


 

رد مع اقتباس
قديم 12-25-2010, 09:47 PM   #27
|مساعد رشيد السهلي 
عضو جديد


مساعد رشيد السهلي غير متصل

بيانات اضافيه [ + ]
 رقم العضوية : 10082
 تاريخ التسجيل :  Dec 2010
 أخر زيارة : 03-16-2012 (07:06 AM)
 المشاركات : 39 [ + ]
 التقييم :  25
لوني المفضل : Cadetblue
رد: ديوان الشاعر / رشيد بن مساعد القباني السهلي



هذة مساجله بين الشاعر/رشيد بن مساعدالقباني السهلي 00وابن اخته الشاعر/محمد بن سعد بن ماضي القباني
أثناء إقامة محمد بن سعد بالمنطقة الشرقية (الدمام) حيث كان مقر العمل قبل أن يغادر تلك المنطقة لمنطقة أخرى من مناطق مملكتنا الحبية

وكانت البدايه من الشاعر /محمد بن سعد ال ماضي القباني




غريب الدار والجـو جـو ثانـي=غريـب الـدار يامبعـد مكانـي
غريب ٍ في وسـط دار ٍ غريبـة=بهـا سنـي وشيعـي وبحرانـي
رمتنـي لعبـة الأقـدار فيـهـا=ووكلـت الـذي بعينـه يـرانـي
إلهي يامعيـن مـن هـو تصبّـر=توقيني مـن صـروف الزمانـي
أنا بالشرق شمـال مـن العدامـة=على سيف البحر حظـي رمانـي
أنـا بالشـرق وأتخيّـل جماعـة=وربـع ٍ يسكنـوا ذيـك المبانـي
كـرام نفـوس طلقيـن المحـيـا=صوانيهم مابين كبـش ٍ وضأنـي
طبايعهـم فعـول الـوقـت الأول=هل النخـوة والأفعـال الحسانـي
سلامـي مـع تحياتـي إليـهـم=جميعـاً كلهـم قاصـي ودانــي
وأخص بالذكر شاعر من خوالـي=أبومساعـد فهـيـم ٍ للمعـانـي
نصيته يـوم جـاء للقـاف حـزة=وأنا اللي من الجوى أشكي وأعاني
بعيـد ورغبتـي شوفـة عيالـي=وأهل بيتي ومن لي مـن عوانـي
وجيـران ٍ لهـم حـق ٍ علـيّـه=عليهـم ستـر رب المودمـانـي
ولا أنسى لحظة ٍ مادمت عايـش=مربّينـي علـى طيـب المعانـي
أبوي وأمي أمانـة فـي حياتـي=لهم في خافقـي قـدر ٍ وشانـي
رعوني من زمن وقـت الطفولـة=وعطوني مابغيت حـب وحنانـي
لاحتى ماكبـرت وأشتـد عـودي=وشفت إن واجبي قـرّب وحانـي
عرفـت إنـه عليّـه واجـبـات ٍ=فرضها منـزّل السبـع المثانـي
وقمت باللي علي أمـلا ضميـري=ولله كـل شـكـري وإمتنـانـي
ولاني مقصـر ٍ لكـن ظروفـي=أبد ماجت على الكيـف الأمانـي
طويت فريّشي ناهـض حجاجـي=في خدمة موطني دامـه دعانـي
تفقدت عزبتـي وسقـت المطايـا=أدوّر عيشتي ما أرضى الهوانـي
أكافـح وأجتهـد وآخـذ نصيبـي=ما دامي قـادر ٍ والعمـر فانـي

الرد من الشاعر رشيد بن مساعد القباني





أنـا البـارح منـام العيـن شانـي=سهرت الليل ماأدري ويش جانـي
لذيـذ النـوم مـا لجلـج بعيـنـي=وترى أسباب السهر خـط ٍ لفانـي
بعثـه محمـد آل ماضـي عليّـه=وفي الظرف حدد موقع العنوانـي
يشكي علي من غربتـه وظروفـه=ويقول حظي عـن هلـي جلانـي
وفزيت بالمكتـوب واللـي جابـه=فزت محب ٍ شـاف لـه خلانـي
وحضّرت فكري والقلـم أوراقـي=والصـدر هـاض بنـدّر القيفانـي
وسطرت من سبر البيوت أجزلهـا=ولانيـب فـي جزلاتهـا بحلانـي
ومانيب أحـب الأبيـات الهزيلـة=ولاخير في قـول ٍ بـلا برهانـي
أنـا غايـة مرامـي وإشتيـاقـي=يجـن سمـان ويرجعـن إسمانـي
ترجمة قاف مـن رصيـد فايـض=وما في الضمير يعبّـره اللسانـي
أنـا لـو إنـي بصفـح وأتـعـذر=كـان العـذر يقنـع بـه الديانـي
ميـر أنـا فـي طبيعـة عاطفيـة=لاأوحيت أنا صوت الندى شعانـي
قـم يانديبـي سمـح الله دربــك=وصل معك خطي عسـاك معانـي
لامـن لفيـت أبوخالـد فقـل لـه =خلك على الغربـة وسيـع بطانـي
طلـب معازيبـك لـزوم ٍ تتـمـه=إبـن الحمولـة مايجـي كسلانـي
وفي غربتك توصف لنـا جيرانـك=وخطوى أجنبي يسوى حد الإخواني
وأهم شيء في القصيـر الصالـح=النشمـي البشـوش المرحبـانـي
إصبر والأفـراج مـن الله قريبـة=ولاتضيـق إلا علـى الحيـوانـي
مـن قـام بالواجـب يثيبـه ربـه=ومع ذا ينول الشكـر والعرفانـي
مـن جـد فأعمالـه لقـى جـزاه=يبغى من أصحاب العمل الإتقانـي
وترى التغـرب خـارج مملكتنـا=خطوى بلد فيهـا العزيـز يهانـي
وإلا أنت في دارك عزيز ٍ مكـرم=مرفـوع هامـه يازبـون الوانـي
الصبر زيـن ومحمـود العواقـب=والمؤمـن موعـود بالإمتحـانـي
وتـرى مثلـك فهـيـم ٍ مايعـلـم=ساير زمانـك ياعـرب المجانـي
قبلك ترانـا مـن الغربـة شكينـا=واللي وطاك مـن العنـاء وطانـي
رحنا جنـوب لنجـران المسمـى=وشرق ٍ حدرنا إلى حد إبـن ثانـي
وأيضا شمال رحنـا يـم عرعـر=وغدينـا مثـل الطيـر الشقلبانـي
لاجاء الواجب نقـوم ونعتنـي بـه=مايتـرك الـلـزوم إلا الجبـانـي
وصلاة الله عدد مـا نـاض بـارق=وماغرّد القمري علـى الأغصانـي
وعدد مـا هـب ذعـذاع النسايـم=علـى الرسـول محمـد العدنانـي


 

رد مع اقتباس
قديم 12-26-2010, 06:43 AM   #28
|مساعد رشيد السهلي 
عضو جديد


مساعد رشيد السهلي غير متصل

بيانات اضافيه [ + ]
 رقم العضوية : 10082
 تاريخ التسجيل :  Dec 2010
 أخر زيارة : 03-16-2012 (07:06 AM)
 المشاركات : 39 [ + ]
 التقييم :  25
لوني المفضل : Cadetblue
رد: ديوان الشاعر / رشيد بن مساعد القباني السهلي



الشاعر رشيد بن مساعد القباني السهلي
كتب هذه القصيدة التي تحتوي على تسعة وسبعين بيت في مجال الحكمة ..
أترككم معها




يقول من هـو فـي الكـلام إستـاد=ولـه البيـوت العاصـيـة تنـقـاد
يقودهـا قـود العسيـف الــدارب=ويطـرب لهـا لا سمعهـا القصـاد
ويذودهـا ذود الضمايـا الــوارده=وتجيه مـن كـل الفجـوج أضمـاد
يازن ميلهـا عـن حـروفٍ تعيبهـا=ويخشـى عليهـا كلـمـة النـقـاد
يصخر صعاب بيوتهـا وتليـن لـه=كمـا يلـيـن الصـلـب للـحـداد
حضّر لها فكره وهاضـت قرايحـه=والصـدر حشـرٍ والفـؤاد حشـاد
يـا سامـعٍ منـي تقبـل نصيحتـي=هديـتٍ لـك مـن صريـح فـؤاد
تـراك فـيٍّ عـن محلـه زايــل=لابـد مـا يطـوى عليـك ألـحـاد
خمس الفرايـض أدهـا وأركانهـا=ومجاهـدك نفسـك تـراه جـهـاد
والوالدين أسرع لهم فـي ارضاهـم=خـلـك لـهـم تـقـوم بإجتـهـاد
تـرى حقـوق الوالديـن كثـيـرة=اخضـع لهـم باللطـف والــوداد
والدتك اللي شالتـك تسعـة أشهـر=وعامين تـوك فـي المهـاد غيـاد
وأبوك مشغـول بـدورة معوشتـك=ياما تحمـل مـن التعـب مـا كـاد
يرجيك رجوى ناثر الحب في الخلا=ولا تجـي لــه عـلـة الأكـبـاد
والضيف لامن جـاك هـل بقدومـه=إستقـبـل الضيـفـان بإستـعـداد
ترى أول قرى الضيفان قولت مرحبا=وإسـراع بالدلـة علـى الـوفّـاد
من قبلنـا قـد قـال فيهـا سويلـم=عجل بهـا لـو هـي بـدون قنـاد
ثاني قراهم هات من الضـان حايـل=وإختص كا سرت العامـود عمـاد
فـإلى تعشـوا وأجبـوا للسوالـف=سولـف عليهـم لايجـيـك ونــاد
إحـذر تـروح بساعتـك للحلـيـه=ليـن إن ضيوفـك يطلبـون رقـاد
والجار لـه حـقٍ عليـك وواجـب=لابـد مـا يقفـي رحيـلـه شــاد
إن كان من الرحـال هـذا مصيـره=سيـور بيتـه يقشـعـن الأوتــاد
وإن كان ساكـن دار بـده مفارقـك=أمـا غـدرت وبــدت ولا بــاد
إحذر على غرت حريمـه تراقـب=خلك عزيـز النفـس عنهـن صـاد
وتحمل لغيض إبـن عمـك وزلتـه=بينـك وبينـه لا يصـيـر عـنـاد
وإن قامت الشحنـات بينـك وبينـه=حـاول تــدور للـوقـد إخـمـاد
وإن شبـت الفتنـة وولـع فتيـلـه=يسلمـك مـنـه نــازح الـريـاد
شبرٍ من البيـداء يعوضـك بربٍعتـه=مثلـه تـرى فرقـاه مـن الأعيـاد
وحاذور بنت اللاش لو هي جميلـة=لوزينهـا مشهـور زيـن إمـهـاد
يأتـي ولدهـا عابـت مثـل أبوهـا=طيـر قليـل الـفـود فـيـه إرداد
لاتاخـذ إلا بنـت قـرمٍ مـجـرب=حرٍ إلـى منـه قنـص بـه صـاد
ياتـي ولدهـا صيرمـي قطـامـي=طير السعـد يشفيـك فـي الهـداد
وعينتنـا كـل المشاكـل بسيـطـة=والمشكلة لامـن أخلفـوا الأحفـاد
الله يحمانـا ويصلـح مـا عـطـى=ويـسـرنــا بـهـدايــة الأولاد
ولا جاك طالب حاجة فإقضهـا لـه=عطـه لزومـه لا تـقـول لــداد
عطـه ولـو إن مدتـه لـك قليلـه=لاتعـتـذر وتماطـلـه بـأوعــاد
وراعي الوفاء والطيب جازه بمثلـه=وأعلـن بمعروفـه علـى الأشهـاد
من عاملك بالطيب بالطيـب عاملـه=ولفعل الجميل إحذر تجـي جحـاد
وإلى من سمعت القول والقيل إتركه=مـا ذكـر طـراد الحكايـا ســاد
خلـه لنـذلٍ مـن منـاه إلتقـاطـه=وعـن إلتقـاي الموجبـه شــراد
لا تبحث الجحران ما فـات إدفنـه=لا تصيـر نقمـه لـدكـم طــراد
ولا تشمت المخلوق لا صار مبلـي=تـرى البـلاوي يدرفـن إجــداد
قــل الله يعافـيـه ولا يبتلـيـنـا=وإسلـك طريـق الحـق والرشـاد
خوفٍ من اللي حادث ٍ لـه يصيبـك=الله رقيـب الخلـق فـي المرصـاد
وراعي النميمة لا تحطـه جليسـك=تـراه نـذلٍ مـا علـيـه إجــلاد
يجيـك بالنمـة ويـاخـذ مثلـهـا=ويثيـر مـا بيـن الثنيـن أحـقـاد
هـاذاك ودك مـا يبقـى جلـوسـه=وينفى مـن الديـرة مـع الأكـراد
وممساك في دارٍ عن الهـون مبتعـد=أخيـر لـو إن الـفـراش كــداد
وممسـاك فـي دار المذلـة مهانـة=لو الحريـر فـراش لـك ووسـاد
أخير مـن دار المذلـة تشـوم بـك=مـا فيـك ياوافـي الشبـور قيـاد
أطلق خطى الرجلين وإشحـذ خيـر=مـن دون بابـه مـا وقـف حسـاد
وأوصيك لا تنصى اللئيـم لحاجـة=ترى الـردي كنـه سـراب حمـاد
تنظـر لميعـه مـن بعيـد ويغـرك=وإلـى قربتـه زاد عنـك إبتـعـاد
مالايجود بحـزة الضيـق والقسـاء=ماله فخر وقت الرخـاء لـو جـاد
الجود في الشـدات عنـد اللـوازم=لامن غشـى وجـه اللئيـم سـواد
الانذال مثل الرِّس مـا ينـورد لـه=وإلى ورد لـه مـا سقـى الـورّاد
الأنـذال مثـل الليلـة الخدرسـيـة=واللي سـرى فيهـا يشـوف أنكـاد
الأنذال صبخاً خاسرٍ من زرع بهـا=ولا من ورى الأرض الصباخ حصاد
والأنذال حيفة وقت ما ينرتـع بهـا=ولا خبـر فيهـا لرتـوع مــراد
الأنـذال لابخصتهـم مــا تبيـهـم=الأخلاق شرسـه والوجيـه زهـاد
الأنذال مالك مـن وراهـم غنيمـة=ولا لـك مقـرٍ عنـدهـم وقـعـاد
هـاذي خصـال الخايبيـن أنهيتهـا=وببتـدي فـي سـيـرة الأجــواد
الأجواد عدٍ من ورد جالـه إرتـواء=ولـو كثـروا الـوراد جـمـه زاد
والاجواد شجرة عنبـر مـا تملهـا=الريـح طيـب والضـلال بــراد
والاجواد تعرف بالخصال الحميـدة=ولهـم بشامخـة العـلا مصـعـاد
الاجـواد مثـل النايفـات الرفيعـة=يرقى سنـود مـن زبـن الأطـواد
الاجواد لا قاربتهـم نلـت خيرهـم=للملتجيـن وللضـعـوف إسـنـاد
الاجواد مثل الغيث ينـور بالوطـاء=لابـعـد الله ديــرة الامـجــاد
من جالس الأجـواد يكسـب نثيلـة=ومن جالـس الأنـذال مـا إستفـاد
الفرق مـا بيـن الطرفيـن شاسـع=وكلٍ علـى منهـج طبوعـه حـاد
كلٍ على طبعـه يواصـل مسيرتـه=مـن عصـر نـوح وثمـود وعـاد
هذا وأنا صرحت ما فـي خاطـري=ولانـي وكيـل آدم علـى الأفـراد
الله خلـق خلقـه وفـرق بينـهـم=نـاسٍ شقييـن ونــاس أسـعـاد
ترى السعيـد اللـي جمعهـا كلهـا=ديــنٍ ودنـيـا رابــحٍ وكــاد
وترى الشقي اللـي جمعهـا كلهـا=ضعـف الأمـان وللـردى معتـاد
وصلوا على خيـر البرايـا محمـد=ماأنهـل وبــل وأرزم الـرعـاد
شفيع الأمـة فـي نهـار التلاقـي=لاجـاء نهـار الحشـر والميـعـاد
لاجوا عرايا شاخصـاتٍ أبصارهـم=يسعـون مـن الأجـداث كالجـراد
أزكى صـلاة عليـه وعلـى آلـه=وإعـداد ماهـز الغصـون أنــواد


 

رد مع اقتباس
قديم 12-26-2010, 08:56 AM   #29
|مساعد رشيد السهلي 
عضو جديد


مساعد رشيد السهلي غير متصل

بيانات اضافيه [ + ]
 رقم العضوية : 10082
 تاريخ التسجيل :  Dec 2010
 أخر زيارة : 03-16-2012 (07:06 AM)
 المشاركات : 39 [ + ]
 التقييم :  25
لوني المفضل : Cadetblue
رد: ديوان الشاعر / رشيد بن مساعد القباني السهلي



انا اول كلامي بذكر الله عليم الغيب=عظيمً خلق خلقه والارزاق كافلها
وانا ان قلت قول قالو العارفين مصيب=اختار الجزايل والهزيلات اهملها
انا ان ربت واستنكرت من واحد قريب=اغض النظر عن زلته واتجاهلها
اغض النظر وامشي مع وقتنا العصيب=ابين ظواهرها والاسرارقافلها
ولانيب منهو لاتضايق يشقّ الجيب=اخضع لميلها لين ربي يعدلها
والانسان ياخذ ماكتب له من النصيب=واعرف ان حقوق الغير مانيب نايلها
ترى باذل المعروف في الخايبين يخيب=مثل من زرع بارضً قليل محاصلها
انا اهني اللي يزرع الطيب في اهل الطيب=قروم الرجال اللي تنومس فعايلها
رفيق الرخا ماهوب لك محزم قطيب=يخليك بالحفره اليا طحت باسفلها
ترى الفرق في شيّال عنك الحمول هديب=لاقرب حمول الظيم ثار بعدايلها
يسرك إلى منه حصل موقف رهيب=لامن كبرت القولات عنك تحملها
انا ماتخذلي من ضعاف النفوس صحيب=إلى صار لي معهم علاقات ابدلها
إلى شفت ماعفت مافي النكوفه عيب=بخلي رذال القوم تقفي رحايلها
وانا مانخدع مع عالم دوبها التنقيب=من خوفي لنا في الدرب تنصب حبايلها
يقول اسأل مجرب ولاتسأل الطبيب=اسلاف القبايل سابقتنا مثايلها
ترى التجربه برهان مافيه شك وريب=عملت التجارب واظهرت لي دلايلها
احب التجارب واستفاده من التجريب=واحب اكتشف ناس خبيثه دغايلها
الى جيتهم في واجب دبّروا هريب=كما جول صيد دايف الملح جفّلها
عن المرجله والطايله جنبو تجنيب=خبول تكبّر والردا في محاثلها
هذا والبشر ماني على شؤونها رقيب=ماوكلّت اعدلها إلى شفت مايلها
مير اشوف وقت فيه ورع المهاد يشيب=هل العرف والتفكير والعقل مزعلها
حتى الرجل للربع الدنيه غدى حريب=ياحيف القبايل فيه كثرت مشاكلها
وانا ان قلت كلمة حق ما للكلام مجيب=ناسً اخو مره بالقلاعه تخيلها
ترى قرب بعض الناس للمجتمع تخريب=نيران الفتن من بين الاجواد يشعلها
نصيحه مع الآشرار لاتسكن الشعيب=لاتسكن بداراً والمقاريد تدهلها
ترى بعدهم لو صرت في ديرة غريب=اعز لمقامك من قرودً تقابلها
عسى بيني وبين المقرّد يعوي الذيب=وعسى دارهم عنها الطراشين نسألها
مابي قربهم لو نقّعو عندي الحليب=ولا اخنع لهم نفسً رفيعه منازلها
وصلاة وتسليم على المصطفى الحبيب=نبي وفى برسالته يوم حملها

الشاعر/رشيد بن مساعد القباني السهلي


 

رد مع اقتباس
قديم 12-27-2010, 07:24 AM   #30
|مساعد رشيد السهلي 
عضو جديد


مساعد رشيد السهلي غير متصل

بيانات اضافيه [ + ]
 رقم العضوية : 10082
 تاريخ التسجيل :  Dec 2010
 أخر زيارة : 03-16-2012 (07:06 AM)
 المشاركات : 39 [ + ]
 التقييم :  25
لوني المفضل : Cadetblue
رد: ديوان الشاعر / رشيد بن مساعد القباني السهلي



قصيدة الشاعر/رشيد بن مساعد القباني السهلي يمدح فيها /فهد بن عبدالله بن فايز القباني و /متعب بن عبدالله بن فايز القباني 000لأنه عندما تعطل وايت نخل الشاعر رشيد بن مساعد وسأل عن ناقله كبيرة تنقل الوايت إلى الورشه رفض فهد بن عبدالله واخوه متعب نقله وقالو نحن نصلحه بأنفسنا وفعلا قامو بأصلاحه وهذه من شيمهم0000

بنت ياللي خصّها الله بالجمالي=نافله بالزين كل المترفاتي
لاتبين الا مداغيش العيالي=النشاما اهل العلوم الغانماتي
مثل فهد النشمي الرجل المثالي=اطمحي للقرم ياشبه المهاتي
ونعم في متعب الاجاله مجالي=نادرًطلعه لروس النايفاتي
الشباب اللي يرومون العوالي=ندراًمهيب تاقع في الوطاتي
يوم عاكس وايتي وانحاس بالي=وضاع فكري والضماء لحق انخلاتي
افزعولي فزعة محب لغالي=فزعة ماتنسى طول الحياتي
في لزومي وقّفو وقفة رجالي=ماتتقّو يوم جات الموجباتي
مني البيضاء لهم شرق وشمالي=ومن الجنوب الى الديار الطاهراتي
جارهم الله من صواديف الليالي=واطلب الهم بالتقدم والغناتي
ليتهم يبغون جزءًمن حلالي=كان هذي من الآمور التافهاتي
الجماله غلبة ديوناًاثقالي=في الظهر مثل الحمول الكايداتي
ولو اني منحاز لامني ولاالي=وتارك العالم وكابع في عباتي
كان بطني من حقوق الناس خالي=وسالمين من جميع اللايماتي
مير مالي عن كريمين السبالي=اشره وعلي للناس اشرهاتي
صحبة رجال الوفاء هي راس مالي=يوم كل له مطامع وامنياتي
والمراجل مثل عسرات الجبالي=دونها طرق صعيبه واطلعاتي
دونها طرق عسيرات المنالي=ماأدركوها اهل العزوم الفاتراتي
والسلام اختام ونهايت مقالي=من النبوب الفاشله يالله النجاتي
ياكريم فوق كل الخلق عالي=عالم بالبينه والخافياتي


 

رد مع اقتباس
 
إضافة رد

مواقع النشر (المفضلة)


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
تغطية حفل زواج الشاب / محمد بن غنيم الخبيش القباني السهلي المركز الإعلامي مجلس اخبار السهول 37 01-18-2012 09:42 PM
ديوان الشاعر محمد جارالله السهلي في السعوديه الآن.. النبراس مجلس أخبار ولقاءات اعضاء مجالس قبيلة السهول 18 04-27-2011 04:09 PM
أسماء أبناء القبيلة الممنوحين قروض عقارية في الدفعة الأخيرة سيف بن معيصب السهلي مجلس أخبار ولقاءات اعضاء مجالس قبيلة السهول 12 03-16-2011 01:54 PM
تغطية حفل زواج سعد بن شبيب الرويعي ال عبيد السهلي محمد الرويعي مجلس اخبار السهول 38 02-24-2011 06:47 AM
ديوان الشاعر/ غنيم بن سعد الخبيش القباني السهلي ناصر حضرم العنقودي مجلس دواويين شعراء السهول القداما وكبار السن 15 06-18-2010 12:14 AM


الساعة الآن 10:52 PM


Powered by vBulletin® Copyright ©2000 - 2018, Jelsoft Enterprises Ltd. TranZ By Almuhajir
HêĽм √ 3.2 OPS BY: ! ωαнαм ! © 2010

جميع مايكتب في مجالس قبيلة السهول من مواضيع ومشاركات تعبر عن رأي كاتبها فقط ولايعبر بالضرورة عن رأي الإدارة

a.d - i.s.s.w

    قبيلة السهول