روابط مفيدة : التسجيل | طلب كلمة المرور | تفعيل العضوية | طلب كود تفعيل العضوية | إتصل بنا   



قبيلة السهول مساحة اعلانية مساحة اعلانية مساحة اعلانية مساحة اعلانية

الإهداءات


العودة   السهول ,, مجالس قبيلة السهول > المجالس الأدبية والتراثية > مجلس الشعر والمحاورة > مجلس دواويين شعراء المجالس
 


ديوان الشاعر / ناصر بن عبود


موضوع مغلق
 
أدوات الموضوع انواع عرض الموضوع
قديم 05-30-2007, 09:01 PM   #11
|ناصر بن عبود 
الإدارة العليـــا للمجالس


ناصر بن عبود غير متصل

بيانات اضافيه [ + ]
 رقم العضوية : 2320
 تاريخ التسجيل :  Jan 2006
 أخر زيارة : 08-16-2019 (06:25 PM)
 المشاركات : 8,295 [ + ]
 التقييم :  385
لوني المفضل : Cadetblue


سوّد الله وجـه جحّـاد الجميـل=إن فعلت الطيـب فيـه بيجحـده
وان تركته يشتغلك بقـال وقيـل=هرجه الأبيض يجي مثل أسـوده
والبديـل إن جيـت أدوّر للبديـل=فالسوالـف كلّبـوهـا معـقـده
صارت الدعوى شكـاه بلادليـل=والبلاء ماتدري من أنـت بيـده
ياجميلي رحت ولاجيـت بجميـل=جيتني من دون خـرج ومـزوده
ليتني دوّرت لـك غـارم كفيـل=لاعسرت الوقـت دينـك سـدّده
وإسترحـت ولاتـولاّك البخيـل=كالح الوجه ان حصل عنك أبعـده
راح جيل وعشت جيل وجاك جيل=رحلةٍ يبـذل بهـا الكـل جهـده
لاتصير برحلتـك عابـرسبيـل=خـل كـلٍ فالعمـل علـى حـده
البنادم لـو يسـوّي المستحيـل=كان خلاّ النـاس غصـبٍ تعبـده
فـي طريقـك لاتحيـد ولاتميـل=انتبه واحسب حسابـك واجـرده
الزمن درسه من الـوزن الثقيـل=ومن نجح في الدرس يبشر بسعده


رابط القصيده الأصلي


 
 توقيع : ناصر بن عبود






قديم 05-30-2007, 09:07 PM   #12
|ناصر بن عبود 
الإدارة العليـــا للمجالس


ناصر بن عبود غير متصل

بيانات اضافيه [ + ]
 رقم العضوية : 2320
 تاريخ التسجيل :  Jan 2006
 أخر زيارة : 08-16-2019 (06:25 PM)
 المشاركات : 8,295 [ + ]
 التقييم :  385
لوني المفضل : Cadetblue


مساجلتي مع الشاعر / نايف السهلي


يقول الشاعر / نايف السهلي


ياهاجسي عطني جديدات الاشعار=خل الجزايل تاقف الدور بالدور
اترك هزيل القول ثم هاتها خيار=مثايلن تصعب على كل مثبور
قم يافلاح القرم جهز للاسفار=نبي نسج الفكر في دوحة زهور
وانته ترى من لابةٍ تاطى الاخطار=اللابه اللي دورها فالزمن دور
كم شيخ قومٍ بعدهم صار تذكار=لوه شجاع ومن هل الطيب مذكور
واركب على اللي كنه العبد والطار=يزيد جنه كل ماأفترت سيور
ابداع في هيكله مسمار مسمار=فيه التطور واضح وفيه محصور
مقصورته فيها التحكم بالازرار=وفيه الفخامه كنها بيوت وقصور
ومزود بشاشات واجراس الانذار=نوعه همر وانا مسميه هامور
منوة غريرٍ صايبه سم الافكار=مطلوب للدوله مكلبش ومخفور
ومعمم ٍ عنّه على كل الاقطار=واصبح مطارد وضعه اليوم مخطور
اعماه فكره يوم طاوع للاشرار=طاوع هل الزلات طاوع هل الزور
من بعدها وجه لوافين الاشبار=ناصر خوي الطيب وافي ومخبور
مثل العلم واضح على راسه النار=ابو جويعد راعي الجود مذخور
كن المعاني تقول له طب واختار=او كنها في دربه اتصف طابور
في مجلسه تلقى به البن وبهار=وتلقى حرار ٍ مابهم زيف وقصور
سلم عليه ولا تعجل بالاعذار=بيقول لك يالقرم مانته ابمعذور
قله اشوف اوضاعنا اليوم تنهار=فيها من التغيير والزيف والجور
ناس ٍ تقلب كل يوم ٍ لها شعار=مع خيل شقرا وين ماوجه يثور
وقت الرخا يسمعك ترحيبه الحار=اوقت الشدايد يزبن الخبل معثور
لاقابلك حطك من خيار الاخيار=ولا اقفيت عنه قال مخطي ومغرور
يظن نفسه فارسٍ حيل مغوار=ويسل سيفه دون تفكير وشعور
متقفين ربعه وخاين وغدار=ماهمته رفقه ولاهوب منعور
هذا الوفا عنده يسبب له امرار=لو رفقته دامت لها سنين وشهور
جسم ٍ بليا عقل وانجس من الفار=والشكل شكل الادمي في جسم ثور
هذا الردي يامال قصاف الاعمار=لا ناقص ٍ ربعه ولاهوب ممرور
وقت ٍ يخلي صايب الفكر يحتار=يالصاحب اللي تاخذ وتعطي الشور
وختامها صلوا على خير الابرار=اعداد ماخط القلم حرف وسطور



رديت عليه وقلت :



ياحي طاري مكرم الضيف والجـار=من هاجسٍ صافي وطيّب ومسـرور
حيّه وحي اللـي لفانـي بالأخبـار=وجاب القصيد اللي كما الورد منثور
أنا تنومسني سواليـف الأخيـار=اللي مواقفهم تشعشع كمـا النـور
شروى أبوفيصل طيّب العرف والكار=والطيب لأهل الطيب له درب مأثور
شاعر وله نظرة بعيديـن الأنظـار=ويكفيك بأنّه سابـحٍ سبعـة بحـور
وأنا بنفسي بآصلـه فـوق فكسـار=والجيب فالقوّه مع الناس مشهـور
خويّك الطيّب علـى كـل مشـوار=وافي وتحت يديك منهـي ومامـور
ياما أطيب الفكسار فأوقات الأمطـار=في تختخٍ عقب أربع أيـام ممطـور
2006 فيـه تـاريـخ الإصــدار=و2007 لـه مسمّـى ولــه دور
جمّـع مـن الألوان لولـو ومحّـار=وذهـب علـى فضّـه ودرٍِ وبلّـور
مراتبـه كنـب طويليـن الأعـمـار=والقير كنّه تحـت يمنـاك باكـور
من حظ مطنوخٍ ماحسّـب للأسعـار=رآسه على صك المهمّات مصطـور
كنّك ليامنّـك ركبتـه علـى القـار=عرهان بن باتل بوقته على الكـور
لاصاح بالبلها على القوم ثـم غـار=بإذن الله إن الجيش فالحرب مكسور
ويانايف إن كانك تحرّى للأشـوار=إسمع كلامي وأنت وافي ومشكـور
ترى الردي ماهوب في حلقك زرار=وإن كان جاملته فلاأنتـه بماجـور
بالك تجامل معـه لوصـار ماصـار=ماأنتب على مجامل هالأشكال مجبور
كـذّاب ومنافـق وجاحـد وهـذّار=وفالزاويه يالقـرم تلقـاه محشـور
دايم على الغـرّات طالـع وسبّـار=وإن ماحصل له شي يرسل له سبور
لو الـردي لابـار علّـق بشنكـار=ماكان والله شفتـه يلـف ويـدور
ولاباع خوّة من وفـى لـه ولابـار=يذكر وراه العلم الأقشـر ولايبـور
ولوكل مافالقلـب يكشـف بمنظـار=لأفتح لك صدورٍ وأغلّق لك صـدور
لكن معاوين الزمن صـاروا كثـار=تجمّعوا من حولنا العمـي والعـور
تجّـار هـرج ولايسمّـون تجّـار=الفقر في صرّة هل الهرج مصـرور
من جاك منهم جـاك بعلـومٍ كبـار=يكبّـر فعولـه ولوكـان مكـبـور
مثل البعير زريـق رغّـاي هـدّار=وإن حملوه بحمل يبرك على الزور
درب الرجال يمين ودريبـه يسـار=مايملك الطـولات وقصيّـر شبـور
ثوب المراجل عنّه كمومـه قصـار=متلبّـسٍ ثـوبٍ مرقّـع ومشبـور


رابط القصيده الأصلي


 

قديم 06-04-2007, 05:49 PM   #13
|ناصر بن عبود 
الإدارة العليـــا للمجالس


ناصر بن عبود غير متصل

بيانات اضافيه [ + ]
 رقم العضوية : 2320
 تاريخ التسجيل :  Jan 2006
 أخر زيارة : 08-16-2019 (06:25 PM)
 المشاركات : 8,295 [ + ]
 التقييم :  385
لوني المفضل : Cadetblue


ياشين لون الحزن في وجه الحزين=يظهر عليك الهم عيانٍ بيان
أنا أشهد إن الهم بيّاح الكنين=ماله حدود ألاّ مع حدود الجنان
ينقض عليك جروح ماضيك الدفين=ويذكرك ماكان ماضي من زمان
ياليل ياليل المودّه والحنين=الجو هادي والولايف في أمان
وين أنت عنّي ياعذاب العاشقين=ياناعم الخدين يالعود الليان
ياغظ الأنهاد وياريح الياسمين=ياداعج العينين ياعذب الثمان
سايلك بالله يارضي الوالدين=ترى الغلى ماله زمان ولامكان
ألاّ إن تدخّل بيننا ابليس اللعين=فالله على بعض العلوم المستعان
وجه الزمن قاسي ولايمكن يلين=وأيامنا هذي دروسٍ وامتحان
عذالنا تشتم وحنّا ياثنين=ماهمّنا لويشتم فلان وفلان
الدرب سيده لايسار ولايمين=والعشر تبقى عشر ماترجع ثمان
خلّك معي وأنا لك الحصن الحصين=من لايغامر عاش فالدنيا جبان
يندى جبيني منك ياصافي الجبين=بالله لاتشكي المهونه والهوان
شكواي أنا وأنته لرب العالمين=والله على الدنيا وأهلها المستعان


رابط القصيده الأصلي


 

قديم 07-03-2007, 11:08 PM   #14
|ناصر بن عبود 
الإدارة العليـــا للمجالس


ناصر بن عبود غير متصل

بيانات اضافيه [ + ]
 رقم العضوية : 2320
 تاريخ التسجيل :  Jan 2006
 أخر زيارة : 08-16-2019 (06:25 PM)
 المشاركات : 8,295 [ + ]
 التقييم :  385
لوني المفضل : Cadetblue


بعض العرب طيبك معه منْك محسوب=وبعض العرب طيبك معه لك مذلّه
ياعنْك شيٍٍ مايجي منْك باسلوب=ماينقبل لاصار في غير حلّه
فالناس يابن الناس ماأنته بمغصوب=من صد عنّك صد عنّه وخلّه
راع الوفى في ذا الزمن عاش مغلوب=الطيّب اللي معْه مذهب وملّه
تضحك عليه مشذّبة كل عرقوب=أهل النفاق اللي بهم كل علّه
اللي تسحّب كل ماكان مسحوب=الشلّه اللي تشتمل كل شلّه
ضعاف فوق ذنوبها تكسب ذنوب=وراع المصالح مااحْد منهم يملّه
لوكان خبلٍ يلبس الثوب مقلوب=قالوا هذا اللي عنده العلم كلّه
جبلةٍ شرْبت مع الماء من الكوب=ياأهل الجبلّه لعنبو ذا الجبلّه
لاعاش رجّالٍ من العز مسلوب=لاصار ماأحدٍ يمدحه في محلّه
مايكتسي عن واجبه غتره وثوب= ولاينتمي للطيب دقّه وجلّه
في مجلس أهل الطيب ماهوب مرغوب=أمّا حفر لفلان وألاّ دفن له
لوكـان لاطالـب ولاهـوب مطلـوب= يبطـي وقلبـه مابـرد فيـه غـلّـه
يتعب وفنجاله على طـول مشـروب= يبـلاك فـي نفسـك ويطلـع بذلّـه
خلّه يبلّط بحر جدّه من الطوب=وبحر جدّه كل خبلٍ يدلّه


رابط القصيده الأصلي


 

قديم 07-06-2007, 08:17 PM   #15
|ناصر بن عبود 
الإدارة العليـــا للمجالس


ناصر بن عبود غير متصل

بيانات اضافيه [ + ]
 رقم العضوية : 2320
 تاريخ التسجيل :  Jan 2006
 أخر زيارة : 08-16-2019 (06:25 PM)
 المشاركات : 8,295 [ + ]
 التقييم :  385
لوني المفضل : Cadetblue


بيني وبين الشاعر الكبير / خالد بن غنام السهلي



يقول خالد :


ليا طربـت وزان للقـاف معنـاه=قيدت جزلـة واعتـق الله هزيلـه
ماني من اللي لاطرا الهرج درباه=ولايميـز مـن خفيفـه ثقيـلـه
العاقل ليا عجز في الشـي خـلاه=والخبل يشقى به ولايستـوي لـه
والخط نتعب له على حق منصـاه=والجود بالماجود عـذر وفضيلـة
ابن جويعد كيـف حنـا عرفنـاه=وشرواه دايم نـادر بيـن جيلـه
لاشك راع الطيب تظهره يمنـاه=وتمركزه من فوق راس الطويلـة
شاعر وتطبخ من حميـاه حمـاه=وفي العرف والمعروف يازن قبيلة
بابه على رجل وضيوفه مقهـواة=متحيـزم للطيـب والله وكيـلـه
مجلسه مدهال الرجـال المسمـاة=وموقفه فضـاح العيـون الذليلـة
يابوجويعدقيمـة الرجـل مبـداه=ومن له براسه راي يعرف دليلـه
الضعف ماغدى الضعيف وعشاه=ومن يندعي به مات مايندعي لـه
يابغضي لمن يبلع الضيم بغضـاه=وياحبنـي للقـرم ياحبنـي لــه
شرواك نفخر به بوقت المباهـاة=في عسف موقفة البيوت الجزيلـة
وان ناش راع الثرثرة والمثـاراة=راس الفتيلة فـوق راس البتيلـة
تراك منصى العلم لاضاع منصاه=لابان فقر اللـي قليـل حصيلـه
واهل الجهالةجودهم فـي المبابـاة=ولايفرقون مـن الجبيـل الجبيلـة
الله يجنبنـا الـدروب المـلـواة=ويعزنـا بالواجـبـة والنفيـلـة



ردّيت عليه وقلت :




من قبل ماأبدى الـرد سميـت بالله=والله يقدرنـي لــرد الجميـلـه
اليا قريـت أبيـات شعـرٍ مغنـاه=من نظم أبوغنـام شـوق الجميلـه
عفت القصيد اللي كتبته من أدنـاه=ولاودّي اني فالقصيد أنتمـي لـه
الشعر سلعة عند خالـد وشـرواه=اللـي بمكيـال الجزالـه يكيـلـه
شاعر من فحول الشعر لامظاهـاه=وملاحمه في المدح تبقـى كفيلـه
يامرحبا ياصاحب الوجه والجـاه=منّي عـدد ماهـل وبـل المخيلـه
اللـي سواتـك يعجبنّـي سجايـاه=قدره على العين وعلى الرآس أشيله
ماكل من جانـي تخاويـت وايـاه=لوطرقته ماهيـب عنـدي طويلـه
من قبل لاأعرفه وأراكيه مركـاه=آخذ كثيـره قبـل لاأخـذ قليلـه
وان كان كفّي ماخذى منّـه امـلاه=لاهو عميلٍ لـي ولانـي عميلـه
يلقى من العالـم شبيهـه وحليـاه=والكل ينظح كـل مافـي صميلـه
ومن لااستفاد من التجارب بدنيـاه=ماهـوب ماخذهـا بيـومٍ وليلـه
الرجل يصبر لو زمانـه توطـاه=يصبر ولوجور الزمن هـد حيلـه
وولد الردي يبلاك لارحم مجنـاه=لاشان وقته جـاك يومـي شليلـه
ولوتطلبه رد الثناء تقصر خطـاه=ويقول ماعنـدي ولالـي وسيلـه
وفي غيبة الغيّاب يابعـد ممشـاه=يسرج على عرض المقفين خيلـه
حصانه اللي يـوم عنّـه وعنّـاه=قلاعته مـن تحـت راع الرذيلـه


 

قديم 07-22-2007, 07:33 AM   #16
|ناصر بن عبود 
الإدارة العليـــا للمجالس


ناصر بن عبود غير متصل

بيانات اضافيه [ + ]
 رقم العضوية : 2320
 تاريخ التسجيل :  Jan 2006
 أخر زيارة : 08-16-2019 (06:25 PM)
 المشاركات : 8,295 [ + ]
 التقييم :  385
لوني المفضل : Cadetblue


أشهد ان الحب للعاشـق مشقّـه=والمولّع مايبي طـاري المفـارق
قلبي اللي فالمحبّـه جـاه حقّـه=كن نوباته مثل ظـرب المطـارق
لاطرى لي صاحبي يـزداد دقّـه=ابو ثمانٍ لا ضحك لي نور بارق
جل ربٍ صـوّره منظـر ورقّـه=بدر ليلٍ فالسماء موضي وشـارق
من فراقه مابقى الاّ الجيب أشقّـه=بس قلبي في بحور الحب غـارق
ياعيونـي مـن يحبّـك لا تعقّـه=ولا تصير لقلبه المجروح سـارق
لا زعجت الصوت أنادي لا تصقّه=التفت لي شوفني بالريق شـارق
بق لي شيٍ بسيط أرجـوك بقّـه=لا يغرّك زينك اللي حيل خـارق
وافهم الموضوع من جلّـه لدقّـه=لهفتي والشـوق مافيهـن فـارق
واطلب الي تآمـره منّـي ونقّـه=وداو جرحٍ فالحشا لاهب وحارق


رابط القصيده الأصلي


 

قديم 08-09-2007, 01:40 AM   #17
|ناصر بن عبود 
الإدارة العليـــا للمجالس


ناصر بن عبود غير متصل

بيانات اضافيه [ + ]
 رقم العضوية : 2320
 تاريخ التسجيل :  Jan 2006
 أخر زيارة : 08-16-2019 (06:25 PM)
 المشاركات : 8,295 [ + ]
 التقييم :  385
لوني المفضل : Cadetblue


مسموح عن بلواي ياعازف الناي=تلقى عذابك لـو تقـوم القيامـه
لاياالبنـادم يـوم جينـا انتنـادم=ضيّقت صـدري يانديـم الندامـه
والله ماعندي فيك لكـن أداريـك=خلّك على بساط الكرم والكرامـه
لوظنّتي حبّيـت مثلـي وملّيـت=ماكان يلحقـك الملـل بالملامـه
جفوى المدلّع من عـذاب الولّـع=اللي تعلّق يوم سلهـم سهامـه
وان قلت علّم قلـت روّح تعلّـم=القلـب حيـد ولانعلّـم علامـه
الرجل همّه يرتكـي لـه بهمّـه=الرجل يعرف من مقامه مقامـه
دام المهمّـه للأمـور المهمّـه=كبير الأسم يفوز واسمه وسامـه
ومن يجحد المعروف تراه معروف=مثل الجمل على سنامه مسامـه
ولّيت ياعازف ترى عنك عـازف=الـذل طبـعٍ للنعامـه عـلامـه


 

قديم 08-23-2007, 03:55 AM   #18
|ناصر بن عبود 
الإدارة العليـــا للمجالس


ناصر بن عبود غير متصل

بيانات اضافيه [ + ]
 رقم العضوية : 2320
 تاريخ التسجيل :  Jan 2006
 أخر زيارة : 08-16-2019 (06:25 PM)
 المشاركات : 8,295 [ + ]
 التقييم :  385
لوني المفضل : Cadetblue


هذه المساجله بيني وبين الشاعر / سعد بن فهد القريني ( الله يرحمه )


لعلّه يكسب منكم الدعاء عليه بالرحمه والمغفره



أقول /


هاضت هجوسي واوقفت لـي بحيلهـا=تشبـه لضلـع طويـق والله وكيلـهـا
وشاشت بها أفكاري ورآسي من الصطر=يقـدح لهـا زنـدي ويـالـع فتيلـهـا
وشعمـت نـاري ثـم قرّبـت دلـتـي=وقمت أحمس مـن البـن وأدق هيلهـا
وقمت أتخيّـر لأجلهـا مـن معارفـي=مطنـوخ قـرم وصاطـيٍ يحتمـي لهـا
واخترت أنا سعـد القرينـي بخاطـري=ابـن الرجـال اللـي تزبّـن دخيلهـا
قرينيـةٍ يـاحـي طــاري فعولـهـا=تعرف نهار الحرب مـن طلـع خيلهـا
حنا وهم في نجد عشنـا علـى النقـى=وقــومٍ تعاديـنـا بـلاهـا وويلـهـا
ناطـا مهابتهـا ونسـبـي شيوخـهـا=حتـى ان طمعتهـا تصيـر برحيلـهـا
يابوفهـد لاتحسـب انّـي مجامـلـك=مدحه لأجـل ربعـك ترانـي كفيلهـا
واخــلاف ذا يابوفـهـد ياسنـايـدي=عنـدي قضيّـه ماعرفـت اتحليلـهـا
الشعـر صابـه ميلـةٍ فـي طرايقـه=مالـوا بـه الجهّـال مـع زود ميلهـا
يابوفهـد شعـر الحـداثـه مانفهـمـه=وقصيدتـه مـاأدري وشنهـو فصيلهـا
لاقـام شاعرهـا وبــدّى قصيـدتـه=قصر القصيده مستـوي مـع طويلهـا
واليا نقدتـه فـي قصيـده وقلـت لـه=يا ابن الحلال بيوتـك أحسـن تشيلهـا
ظـاق وتعـدوا لـك وشانـت نفيستـه=وأخـذ مكايـيـل اللعـانـه يكيلـهـا
شعّـار تحـت شعـار تجديـد مفـرده=يحسبـون لهجتنـا يتغـيّـر موديلـهـا
تدري غراب البيـن وش لـون مشيتـه=شـاف الحمـام ومشيـتـه ياحليلـهـا
وقلّد بهـا ولاعـرف كيـف وابتلـش=وعمـي البصايـر دوم هـذا حصيلهـا
هات المشـوره وأنـت رآيـك يهمّنـي=والسالـفـه ماتثـبـت ألاّ بدليـلـهـا
والحمد للـي عـز الاْسـلام والثننـى=وأنـا البشـر مانـيـب لآدم وكيلـهـا


رد الشاعر / سعد القريني ( الله يرحمه )


يامطـرّز بيـوت القصيـد بجميلـهـا=مثايـلـك مـاقـط شفـنـا مثيـلـهـا
يامرحبابـك يالظهـيـري ومسـهـلا=اعـداد ماهـل المطـر مـن مخيلهـا
ويامرحبا بـك عـد ماذعـذع الهـوى=واعـداد رمـل المملكـه مـع نخيلهـا
واعـداد دورات الفلـك والكـواكـب=واعـداد حجّـاج الـحـرم وتهليلـهـا
ترى المدح لأهل المدح يستاهل الثنـى=كـل القبيـلـه كاسبـتـه ويجيلـهـا
فعول السهـول تبيـن والعـز ساسهـا=روس الرجـال الكايـده ترتكـي لهـا
صدقت عشنا يالسنافـي علـى النقـى=وندقـم شبـا عدواننـا ونعـدي لـهـا
وصرتوا على طـول الدهـر والليالـي=عوانـيٍ نتعـب لهـا ونعـنـي لـهـا
والقلب ياناصـر علـى القلـب شاهـد=كلمة وفـى منّـي لكـم نهتـوي لهـا
اخترتنـي وأنــا عـلـى مابغيتـنـي=أفـهـم معانيـهـا وأداوي عليـلـهـا
ميـر الحداثـه لاتهـمّـك وتشحـنـك=جنّـب مجالسهـا وجـنّـب هبيلـهـا
تياّرهـا لــو دار وافـتـر وابـتـرم=ماهمّنـا شعـر الحـداثـه وجيلـهـا
ناسٍ على الموضـه تتابـع وتركـض=تركـض وتلقـى عالـمٍ تنتحـي لهـا
هـذي فـراغ عقـول ماهـي فراسـه=ضاعـت كثيرتهـا وضاعـت قليلـهـا
تـبـي تـقـدّم وتـأخـر فعـولـهـا=وش لون أخلّي لهجتـي ماأنتمـي لهـا
مير النصيحـه شـد حبـل النصيحـه=يقولهـا اللـي خوّتـك يعتـزي لـهـا
عليـك بالشـعـر القـديـم ونسـجـه=لا عرّضـت قصيدتـك ينصغـي لهـا
وختامهـا مـنّـي ســلام وتحـيّـه=لناصـر حفيـد الطيّبـيـن وسليلـهـا

رحمة الله عليك يابوفهد


 

قديم 09-09-2007, 11:29 PM   #19
|ناصر بن عبود 
الإدارة العليـــا للمجالس


ناصر بن عبود غير متصل

بيانات اضافيه [ + ]
 رقم العضوية : 2320
 تاريخ التسجيل :  Jan 2006
 أخر زيارة : 08-16-2019 (06:25 PM)
 المشاركات : 8,295 [ + ]
 التقييم :  385
لوني المفضل : Cadetblue


كل نفسٍ دالهه والهـم عنّـي ماانتحـى=والعيون القشر تسهر عادةٍ لي من سنـه
ماتصوّرت انّي اسهر لين حزّات الضحى=لاجزى الله خير ورقٍ هاضني صوت لحنه
آه ياعيني وقلبي كـن تدرجـه الرحـى=واعذابي كل يـومٍ لااستـدارت تطحنـه
عشت غيبوبة همومٍ من تصيبه ماصحـى=من فراق اللي عيوني والحنايـا مسكنـه
والعواذل فرّقونـا لعنبـو ذيـك اللحـى=بالوشايه والنمايـم لـي تحـد الألسنـه
بس أنا رجال لي ذمّه ويردعني السحـى=وألاّ والله كـان حبّـه للمخاليـق أعلنـه
طابعٍ حبّـه بقلبـي والله انـه ماانمحـى=قلبي المشحون عقبه زاد وجده وشحنـه
شفت عشاق المحبّه كلّهم نـاس شفحـاء=وكل منهم فالمواقف ينعرف وش معدنـه
والسبب بموادعٍ واعدنـي ببعـد النحـى=مابقـى مـن بيننـا ولاوسيلـه ممكنـه


رابط القصيده الأصلي


 

قديم 09-21-2007, 02:22 AM   #20
|ناصر بن عبود 
الإدارة العليـــا للمجالس


ناصر بن عبود غير متصل

بيانات اضافيه [ + ]
 رقم العضوية : 2320
 تاريخ التسجيل :  Jan 2006
 أخر زيارة : 08-16-2019 (06:25 PM)
 المشاركات : 8,295 [ + ]
 التقييم :  385
لوني المفضل : Cadetblue


مساجله بيني وبين الشاعر / ناصر بن فهد القريني



يقول فيها :

سر ياقلم سجّل على بيض الأوراق=سجّل بيوت اللي ترى مايخمخم
أنقّي الجزلات ماأنقّي دقاق=وأصونها من كل عيبٍ لي يذم
واخلافها منّي سلامٍ لك يساق=ياللي لضيفانك حجاجك تبسّم
سلام منّي عد مالاح برّاق=واعداد رعّادٍ بصوته ترزّم
ياراعي الطولات للطيب سبّاق=متعلّمٍ ماأنته بتوّك تعلّم
ناصر من اللي كسبهم هدل الأشداق=لاد الظهيري فالحرايب تقدّم
كم واحدٍ دمّه من فعولهم راق=بمصلاقتٍ جامدٍ فوقها الدم
وله مجلسٍ بابه مشرّع على ساق=يوم ان ولد اللاش بابه ملحّم
ودلال كيفٍ تعجب اللي لها ذاق=وعودٍ من أنواع أجود الطيب قد شم
وعز الخوي ان كان صد الخوي ضاق=ومزبن لمن كشّر زمانه وظلّم
حرٍّ شلع يرقى المراجل للآفاق=والحر هذي عادته كان عزّم
أمدحك مالي مقصدٍ فيه مشتاق=ولانيب في عازه ولانيب مهتم
لكن أشوف الطيّب المدح به لاق=وألاّ الردي لوتمدحه ماتفهّم
أقولها صادق ولانيب لفّاق=ويشهد على ماأقول ربٍّ معظّم
واختامها صلّوا عدد نبت الأدباق=على نبيٍّ نقتدي بما تكلّم



رديت عليه وقلت :


يامرحبا ماتبتدي شمس الإشراق=ياللي قصيدك بالجزاله موسّم
اخترت من جزل التماثيل مالاق=وطوّعت عاصيها وورّدته الجم
الشعر يبغى شاعرٍ يرضى الأذواق=يسبح بحر ويغوص ويخص ويعم
والقاف صيده وأنت شاعر وتفّاق=ماأنتب كما اللي لارمى رمْيه يزم
حبل النصيحه جوّده زين بوثاق=ترى النصيحه نشتريها على كم؟
لاتلتفت في شعر أبوطاق طرباق=خلّك على نهجك معزز مكرّم
عليك ياناصر بدمثين الأخلاق=تراك في خوّة هل الطيب تلزم
ولاعليكم زود في كل ميثاق=من لابةٍ تسقي عداها من السم
لاغارت الغاره مغاوير وسباق=وأهل الأعنّه بالأسنّه تحزّم
لقواتها بحرابها ترهق ارهاق=لاد الظبيبي قسمها مايقسّم
تدوس روس القوم والدم دفّاق=في موقفٍ حامي وروسٍ تصادم
وقفاتها مادونها ستر ورواق=يوم الزمان الشين والوقت الأظلم
من طيبهم ماعندهم غش ونفاق=وقصيرهم محشوم كنّه ولد عم
واللي تدرّق عن لزومه تدرّاق=ماهوب منهم لو بعذره تظلّم
وختامها يالله بسترك والأوفاق=وعلى رسول الله أصلّي وأسلّم


 

 
موضوع مغلق

مواقع النشر (المفضلة)


الذين يشاهدون محتوى الموضوع الآن : 3 ( الأعضاء 0 والزوار 3)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
الاحتفال الكبير بزواج عضو المجالس الشاعر / نايف بن شعمل على شرف صاحب السمو الملكي الامير / فيصل بن أحمد بن عبدالعزيز المركز الإعلامي مجلس اخبار السهول 37 07-03-2011 03:16 PM
الشاعر / ناصر بن حمد الخالدي في ضيافة مجالس قبيلة السهول المركز الإعلامي مجلس الشعر والمحاورة 15 03-06-2011 09:51 PM
قصة اغنية الذهابه لشاعرنا ناصر القحطاني حفيد سحيب مجلس القصص والروايات 6 03-05-2011 09:24 PM
الشاعر الكبير بداح بن محسن بن عبود يتأهل الى المرحلة ماقبل النهائية في شاعر العرب المركز الإعلامي مجلس اخبار السهول 9 12-12-2010 05:19 AM


الساعة الآن 05:47 AM


Powered by vBulletin® Copyright ©2000 - 2019, Jelsoft Enterprises Ltd. TranZ By Almuhajir
HêĽм √ 3.2 OPS BY: ! ωαнαм ! © 2010

جميع مايكتب في مجالس قبيلة السهول من مواضيع ومشاركات تعبر عن رأي كاتبها فقط ولايعبر بالضرورة عن رأي الإدارة

a.d - i.s.s.w

    قبيلة السهول